રાજકુમાર માટે આયટમ સૉંગ કરશે નરગિસ ફખરી
મુંબઈ, 6 મે : રૉકસ્ટાર ફિલ્મ યાદ છે? આ જ સુપરહિટ ફિલ્મ દ્વારા રૂપેરી પડદે એક ચંચળ અને કામણગારી કાયાએ બૉલીવુડમાં પ્રવેશ કર્યો હતો. હા જી, અમે વાત કરીએ છીએ નરગિસ ફખરીની કે જેઓ રૉકસ્ટાર બાદ રૂપેરી પડદે દેખાયાં જ નથી. જોકે તેઓ જાહેરખબર જગતમાં ખૂબ સક્રિય છે.
પરંતુ પુનઃ એક વાર નરગિસ બૉલીવુડમાં ધમાલ મચાવવા તૈયાર છે. આ વખતે તેઓ અભિનેત્રી તરીકે નહીં, પણ આયટમ ગર્લ તરીકે ધમાલ મચાવવનાં છે. મળતી માહિતી મુજબ નરગિસ ફખરી જાણીતા ફિલ્મકાર રાજકુમાર સંતોષીની આવનાર ફિલ્મ ફટા પોસ્ટર નિકલા હીરોમાં એક મસાલેદાર આયટમ સૉંગ કરવા જઈ રહ્યાં છે.
ફટા પોસ્ટર નિકલા હીરો ફિલ્મમાં શાહિદ કપૂર, ઇલિયાના ડીક્રૂઝ અને પદ્મિની કોલ્હાપુરે છે. ફિલ્મ 23મી ઑગસ્ટે રિલીઝ થવાની છે. નોંધનીય છે કે 1998માં રાજકુમાર સંતોષીએ ચાઇના ગેટ નામની ફિલ્મ બનાવી હતી કે જેમાં ઉર્મિલા માતોંડકરે આયટમ સૉંગ છમ્મા છમ્મા... કર્યુ હતું. ફિલ્મ ફ્લૉપ થઈ હતી, પરંતુ આ આયટમ સૉંગ હિટ રહ્યુ હતું.