Saif Ali Khan Attack : સૈફ અલી ખાન પર હુમલાના કેસમાં છત્તીસગઢથી એક શંકાસ્પદની અટકાયત

Saif Ali Khan Attack : બોલિવૂડ એક્ટર સૈફ અલી ખાન પર હુમલાના કેસમાં પોલીસ આરોપી સુધી પહોંચવા આકાશ પાતાળ એક કરી રહી છે.

એક તરફ લીલાવતી હોસ્પિટલમાં સૈફ અલી ખાનની સારવાર ચાલી રહી છે તો બીજી તરફ આ કેસમાં પોલીસે એક શંકાસ્પદની અટકાયત કરી હોવાના અહેવાલ છે.

સૂત્રો અનુસાર, જે વ્યક્તિની અટકાયત કરવામાં આવી છે તે ટ્રેનમાં મુસાફરી કરી રહ્યો હતો. પોલીસને માહિતી મળી હતી કે તે જે શંકાસ્પદ વ્યક્તિને શોધી રહ્યા હતા તે એક્સપ્રેસ ટ્રેનમાં મુસાફરી કરી રહ્યો છે.

આ પછી સ્થાનિક પોલીસની મદદથી મુસાફરને ટ્રેનમાંથી નીચે ઉતારવામાં આવ્યો અને અટકાયત કરાઈ છે. આ શંકાસ્પદ વ્યક્તિનું નામ આકાશ કૈલાશ કન્નૌજિયા કહેવાઈ રહ્યું છે. આ મુસાફર સૈફ અલી ખાન કેસના શંકાસ્પદ જેવો દેખાય છે. પોલીસ હાલ તેની તપાસ કરી રહી છે. જો કે હજુ સુધી પોલીસને કોઈ નક્કર પુરાવા મળ્યા નથી.

છત્તીસગઢના દુર્ગ જિલ્લામાંથી અટકાયત કરાયેલા આ શંકાસ્પદ વ્યક્તિની પૂછપરછ કરવામાં આવી રહી છે અને તપાસ ચાલુ છે. પોલીસે આ કેસમાં અત્યાર સુધીમાં લગભગ 50 લોકોની પૂછપરછ કરી છે. આ કેસમાં 35 ટીમો તૈનાત કરવામાં આવી છે.

જણાવી દઈએ કે, મુંબઈ પોલીસે આ કેસના આરોપીની ઓળખ કરી લીધી હોવાના પણ અહેવાલ છે. સીસીટીવીમાં દેખાતા આરોપી જેવો જ એક ફોટો સામે આવ્યો છે. જો કે, પોલીસે તેને આરોપી તરીકે જાહેર કર્યો નથી. શંકા છે કે આ એ જ વ્યક્તિ હોઈ શકે છે જેણે સૈફ પર ઘાતક હથિયારોથી હુમલો કર્યો.

English summary

Saif Ali Khan Attack: Suspect detained from Chhattisgarh in Saif Ali Khan attack case