ફરી એક વખત પોલીસના ચક્કરમાં ફસાાયા શિલ્પા-રાજ કુંદ્રા, જાણો શું છે વિવાદ?

એડલ્ટ ફિલ્મોને લઈને વિવાદમાં આવનારા રાજ કુંદ્રા સાથે સાથે હવે શિલ્પા શેટ્ટી પણ નવા વિવાદમાં ફસાઈ છે. મામલો છેક કોર્ટ સુધી પહોંચી ગયો છે.

અહેવાલો અનુસાર, મુંબઈની એક અદાલતે શિલ્પા શેટ્ટી, તેના પતિ રાજ કુન્દ્રા અને તેમની સાથે સંકળાયેલા કેટલાક અન્ય ઉદ્યોગપતિઓ વિરુદ્ધ ગોલ્ડ ઇન્વેસ્ટમેન્ટ સ્કીમને લઈને છેતરપિંડીની ફરિયાદની તપાસ કરવા પોલીસને નિર્દેશ આપ્યો છે.

મીડિયા રિપોર્ટ્સ અનુસાર, એડિશનલ સેશન્સ કોર્ટે આદેશમાં કહ્યું છે કે શિલ્પા શેટ્ટી અને તેના બિઝનેસમેન પતિ રાજ કુન્દ્રા દ્વારા સ્થાપિત કંપની સતયુગ ગોલ્ડ પ્રાઇવેટ લિમિટેડ, અન્ય બે ડિરેક્ટરો અને એક વ્યક્તિ વિરુદ્ધ પ્રાથમિક દૃષ્ટિએ નોંધનીય ગુનો દાખલ કરવામાં આવ્યો છે.

આ સાથે કોર્ટે BKC પોલીસ સ્ટેશનને રિદ્ધિ સિદ્ધિ બુલિયન્સના મેનેજિંગ ડિરેક્ટર પૃથ્વીરાજ કોઠારી દ્વારા દાખલ કરવામાં આવેલી ફરિયાદમાં લાગેલા આરોપોની તપાસ કરવાનો નિર્દેશ આપ્યો છે.

કોર્ટે પોલીસને આપેલા આદેશમાં કહ્યું છે કે, જો આરોપીઓએ કોઈ કોગ્નિઝેબલ ગુનો કર્યો હોવાનું જણાય તો તેમની સામે છેતરપિંડી, અપરાધ અને વિશ્વાસના ભંગ માટે ભારતીય દંડ સંહિતાની સંબંધિત કલમો હેઠળ એફઆઈઆર નોંધવામાં આવે.

કોઠારીએ પોતાના વકીલો દ્વારા નોંધાવેલી ફરિયાદમાં કહ્યું છે કે શિલ્પા શેટ્ટી અને તેના પતિ રાજ કુન્દ્રાએ વર્ષ 2014માં એક સ્કીમ શરૂ કરી હતી. આમાં રોકાણકારોને ડિસ્કાઉન્ટ દરે સોનાની એડવાન્સ ચુકવણી કરવાનું કહેવામાં આવ્યું હતું અને પછી સ્કીમની પાકતી મુદત પર તેમને નિશ્ચિત રકમ સોનું આપવાનું હતું.

ફરિયાદમાં કહેવામાં આવ્યું છે કે આરોપી વ્યક્તિઓ દ્વારા કરવામાં આવેલા દાવાના આધારે, કોઠારીએ પાંચ વર્ષની યોજના હેઠળ 90,38,600 રૂપિયાનું રોકાણ કર્યું હતું કે તેને 2 એપ્રિલ, 2019ના રોજ 5,000 ગ્રામ 24 કેરેટ સોનું આપવામાં આવશે.

જો કે, કંપનીએ આપેલા વચન મુજબ તેને ક્યારેય સોનાનો નિશ્ચિત જથ્થો આપવામાં આવ્યો ન હતો. ફરિયાદમાં એવું કહેવામાં આવ્યું છે કે, આ રીતે આરોપીઓએ સંપૂર્ણ નકલી પ્લાન બનાવીને કાવતરું ઘડ્યું અને લોકો સાથે પણ દગો કર્યો.

English summary

Shilpa-Raj Kundra caught in controversy once again, Know what is the controversy?