કૅટને શિફૉન સાડીમાં ફિલ્માવવા માંગતા હતાં યશજી
મુંબઈ, 23 ઑક્ટોબર : પોતાના સુરમયી સંગીત, મનમોહક નજારા તેમજ સફેદ શિફૉનની સાડી માટે જાણીતાં યશ ચોપરાની અંતિમ ઇચ્છા તેમની સાથે જ ખતમ થઈ ગઈ. પોતાની દરેક ફિ્લ્મની જેમ તેઓ છેલ્લી ફિલ્મ જબ તક હૈ જાનની અભિનેત્રી કૅટરીના કૈફને પણ સફેદ શિફૉનની સાડીમાં સ્વિટ્ઝરલૅન્ડ ખાતે ફિલ્માવવા માંગતાં હતાં, પરંતુ અફસોસ કે આવું બની શક્યુ નહિં અને તેઓ અધવચ્ચે ચાલી નિકળ્યાં.
આ માહિતી ફૅશન ડિઝાઇનર મનીષ મલ્હોત્રાએ ટ્વિટર ઉપર આપી. મનીષે લખ્યું છે કે જબ તક હૈ જાનની અભિનેત્રી કૅટરીના કૈફને યશ ચોપરા શિફૉનની સાડમાં પોતાની મનપસંદ જગ્યા સ્વિટ્ઝરલૅન્ડ ખાતે આવેલ આલ્પ્સ પર્વતોએ ફિલ્માવવા માંગતા હતાં. તેમણે આ અંગે મનીષ જોડે વાત પણ કરી હતી અને જણાવ્યુ હતું કે તેઓ જ્યારે ગીતનું શુટિંગકરે, તો મનીષે સાથે રહેવું.
આપને જણાવી દઇએ કે યશ ચોપરા દિગ્દર્શિત છેલ્લી ફિ્લમ જબ તક હૈ જાનમાં શાહરુખ ખાન, કૅટરીના કૈફ અને અનુષ્કા શર્મા મુખ્ય ભૂમિકામાં છે. ફિલ્મ 13મી નવેમ્બરે રિલીઝ થવા જઈ રહી છે.
યશજીની ફિલ્મો ભલે તે સિલસિલા હોય, ચાંદની, ડર કે દિલ તો પાગલ હોય, તમામ ફિલ્મોની અભિનેત્રીઓ સફેદ શિફૉનની સાડીમાં સ્વિટ્ઝરલૅન્ડમાં પ્રણયાલાપ કરતાં દેખાય છે. તેથી જો યશજી કૅટરીનાને શિફૉનની સાડીમાં ફિલ્માવવા માંગતા હતા, તો તેમાં કોઈ આશ્ચર્યની વાત નથી.