સનમીતના જ્ઞાન કૌશલ્ય પર મંત્રમુગ્ધ બિગ બી
મુંબઈ, 7 જાન્યુઆરી : કૌન બનેગા કરોડપતિ 6 એટલે કે કેબીસી 6ના પ્રથમ કરોડપતિ મહિલા સનમીત કૌરના અમિતાભ બચ્ચને મન મૂકીને વખાણ કર્યાં છે. અમિતાભ બચ્ચને બ્લૉગ ઉપર લખ્યું છે કે આજના યુગમાં મહિલાઓ કોઈ પણ બાબતમાં પુરુષો કરતાં ઓછી નથી. આ વાત સનમીત કૌરે ખરી રીતે સાબિત કરી આપી છે.
અમિતાભ બચ્ચને લખ્યું છે કે સનમીત ખૂબ આત્મવિશ્વાસુ છે. હૉટ સીટ પર સનમીતના ચેહરા ઉપર જરા પણ ગભરાટ નહોતો. અમિતાભે લખ્યું છે કે સનમીત લોકો માટે અને દેશની દીકરીઓ માટે એક આદર્શ છે.
નોંધનીય છે કે કેબીસી 6માં આ વખતે સનમીત કૌરે પાંચ કરોડ રુપિયા જીત્યાં છે. સનમીત કૌર મુંબઈમાં ભાડાના મકાનમાં રહે છે. તેઓ 12મા ધોરણ સુધી ભણેલા છે, પરંતુ બાળકોને ટ્યુશન આપે છે.
અમિતાભે લખ્યું છે કે સનમીત પાસેથી લોકોએ પાઠ લેવો જોઇએ. સનમીતે સાબિત કર્યું છે કે જ્ઞાન જ સફળતાની ચાવી છે અને જેની પાસે જ્ઞાન છે, તેને સફળ થતાં કોઈ ન રોકી શકે. અમિતાભને સનમીત સાથે મળી ખૂબ ગમ્યું. તેમણે જણાવ્યું કે સનમીત જેવા લોકો દેશ અને સમાજ માટે પથ-પ્રદર્શક બની શકે છે. સનમીત કૌર અગાઉ બિહારના સુશીલ કુમારે ગત સીઝનમાં પાંચ કરોડ રુપિયા જીત્યા હતાં. જોકે સનમીતે પણ પોતાની જીતનો શ્રેય પોતાની મહેનત, જ્ઞાન અને ઉપરવાળાના આશીર્વાદને આપ્યો છે.