સલમાનનો બિગ બૉસ હવે કન્નડમાં પણ આવશે
મુંબઈ, 4 જાન્યુઆરી : ભલે બિગ બૉસ અંગે તરેહ-તરેહની વાતો થાય, પરંતુ તેની લોકપ્રિયતા કોઈ પણ બાબતમાં ઓછી નથી થઈ રહી. આજે પણ રાતના નવ વાગતાં જ બિગ બૉસના ખાસ દર્શકો કલર્સ સાથે ચોંટી જાય છે કે જેના કારણે તમામ વિવાદો છતાં આ શો ટીઆરપી ચાર્ટમાં સૌથી ઉપર જળવાઈ રહ્યો છે. એક અલગ જ પ્રકારનો દર્શક વર્ગ એકત્ર કરનાર આ શો દ્વારા અનેક ગુમનામ હસ્તીઓ ફરીથી ચર્ચામાં આવી ગઈ છે.
બિગ બૉસની લોકપ્રિયતા જોતાં હવે આ શોક માત્ર હિન્દીમાં જ નહીં, પણ પ્રાદેશિક ભાષાઓમાં પણ બનવા જઈ રહ્યો છે. જો બધુ સમસુથરૂં પાર પડે, તો હવે આ શો આપને માર્ચ 2013થી કન્નડ ભાષામાં પણ દેખાશે કે જે ઈટીવી કન્નડ ઉપર પ્રસારિત કરાશે. આ શોના આયોજકોએ આ બાબતની માહિતી આપી. તે અંગે અનેક વિવાદાસ્પદ કલાકારો સાથે સમ્પર્ક સાધવામાં આવ્યો છે અને શોની તૈયારી છેલ્લા તબક્કામાં છે. જોકે હજુય આ અંગેનો ખુલાસો નથી કરાયો કે શોને હોસ્ટ કોણ કરશે? કારણ કે હિન્દીમાં તો શોના સૂત્રધાર અભિનેતા સલમાન ખાન છે. તેમની લોકપ્રિયતાના પગલે આ શો સફળતાપૂર્વક ચાલે છે અને હિન્દીમાં તેની 6ઠી સીઝન ચાલી રહી છે.
નોંધનીય છે કે બિગ બૉસ અગાઉ કૌન બનેગા કરોડપતિ પણ પ્રાદેશિક ભાષાઓમાં આવી ચુક્યો છે. આ શો ભોજપુરી અને બાંગલા ભાષામાં બની ચુક્યો છે. ભોજપુરીમાં શત્રુઘ્ન સિન્હા તેમજ બાંગલા ભાષામાં સૌરભ ગાંગુલી હોસ્ટ હતાં.