મતદાર યાદીની ખાસ સુધારણા ઝુંબેશ અંતર્ગત અમદાવાદ જિલ્લામાં કેમ્પનું આયોજન

અમદાવાદ જિલ્લામાં મતદાર યાદીની ખાસ સુધારણા ઝુંબેશ (SIR)નો બીજો તબક્કો હાલ ચાલી રહ્યો છે. આ અંતર્ગત અમદાવાદ જિલ્લા ચૂંટણી તંત્ર દ્વારા આગામી ૨૭, ૨૮ ડિસેમ્બર અને ૩, ૪ જાન્યુઆરીના રોજ વિશેષ કેમ્પનું આયોજન કરાયું છે. આ કેમ્પો સવારે ૧૦ થી સાંજે ૫ વાગ્યા સુધી જિલ્લાના તમામ ૫૫૨૪ મતદાન મથકો પર યોજાશે.

ભારતના ચૂંટણી પંચ દ્વારા ૧ જાન્યુઆરી, ૨૦૨૬ની લાયકાતની તારીખે ગુજરાત સહિત કુલ ૧૨ રાજ્યોમાં મતદાર યાદીની ખાસ સંક્ષિપ્ત સુધારણાનો બીજો તબક્કો પ્રક્રિયામાં છે.

આ પ્રક્રિયામાં મતદારો પોતાના વાંધા તેમજ હક-દાવાઓ રજૂ કરી શકે છે. અમદાવાદ જિલ્લા ચૂંટણી તંત્રએ પણ તમામ ૨૧ વિધાનસભા મતવિસ્તારોમાં આ કેમ્પો ગોઠવ્યા છે.

જે મતદારોના નામ હાલની ડ્રાફ્ટ યાદીમાં સામેલ નથી, અથવા જેમની વિગતોમાં સુધારાની જરૂર છે, તેમના માટે આ વિશેષ કેમ્પો એક મહત્ત્વપૂર્ણ તક પૂરી પાડે છે. આ ચારેય દિવસ દરમિયાન દરેક મતદાન મથકે બૂથ લેવલ ઓફિસર (BLO) હાજર રહેશે, જેઓ મતદારોને રજૂ કરવાના જરૂરી પુરાવા અને દસ્તાવેજો અંગે સંપૂર્ણ માર્ગદર્શન આપશે.

વધુમાં નવા નામ નોંધાવવા માટે ફોર્મ-૬, નામ કમી કરાવવા માટે ફોર્મ-૭ અને વિગતોમાં સુધારા-વધારા કે સ્થળાંતર માટે ફોર્મ-૮ સ્થળ પર જ ઉપલબ્ધ થશે.

અમદાવાદ જિલ્લા ચૂંટણી અધિકારી અને કલેક્ટર સુજીત કુમારે તમામ નાગરિકોને અપીલ કરી છે કે, એક પણ લાયક મતદારનું નામ મતદાર યાદીમાંથી બાકાત ન રહે તે સુનિશ્ચિત કરવા આ અભિયાનનો મહત્તમ લાભ લે.

English summary

Ahmedabad district conducts the second phase of the Special Information Registration (SIR) campaign to update the voter list. Camps across 21 assembly constituencies offer Form 6, Form 7 and Form 8 for name additions and corrections, with BLOs available to guide document requirements.