અમદાવાદ: શેલામાં હીટ એન્ડ રનની ઘટના, થાર ચાલકે ટક્કર મારતા ડિલિવરી બોયનું મોત

રાજ્યમાં દિવસને દિવસે અકસ્માતની ઘટના વધી રહી છે, ત્યારે અકસ્માતની વધુ એક ઘટના સામે આવી છે. અમદાવાદના શેલા વિસ્તારમાં થારચાલકની ટક્કરે ફૂડ ડિલિવરી બોયનું મોત નિપજ્યું હતું. આ કારચાલકે એટલી ભયાનક ટક્કર મારી હતી કે વાહનચાલક ફંગોળાઈને દૂર પટકાયો હતો, જેના કારણે તેને ગંભીર ઈજાઓ થતાં મૃત્યુ પામ્યો હતો. આ મૃતકની ઓળખ સફ્ફાન બ્યાવરવાલા તરીકે થઇ છે.

મળતી માહિતી મુજબ શેલા વિસ્તારમાં આ હિટ એન્ડ રન ઘટના ઘટી હતી. જેમાં થાર કાર ચાલકે ડીલીવરી બોયને અડફેટમાં લીધો હતો. આ અકસ્માતની ઘટના ગઈકાલ એટલે કે રવિવારને 12 જાન્યુઆરી, 2025 રાત્રીની છે. આ અકસ્માતમાં કાર ચાલકે મોપેડને ટક્કર મારી હતી. આ ટક્કર એટલી જોરદાર હતી કે મોપેડ લઇને જતા સાફફાન બિયાવરવાલાનું મોત નિપજ્યું હતું.

પોલીસે CCTV મારફતે શોધખોળ શરૂ કરી

આ ઘટનાની જાણ થતાં જ મૃતક યુવકના પરિવારે દાવો કર્યો હતો કે GJ01WS1791 નંબરની કારે અમારા પુત્રના વાહનને ટક્કર મારી હતી. જો કે તેમના આ દાવાની પોલીસે તપાસ શરૂ કરી છે. પોલીસે ઘટનાસ્થળની આજુબાજુના સીસીટીવી કેમેરાની ફૂટેજની શોધ શરૂ કરી છે.

કડક કાર્યવાહી કરવામાં આવે તેવી માગ

અમદાવાદમાં હિટ એન્ડ રનની ઘટનાઓમાં દિવસેને દિવસે વધારો થઇ રહ્યો હોવાના કારણે લોકોમાં રોષ ફેલાયો છે. ત્યારે આ ઘટનાઓ વારંવાર ન બને તેને લઇ લોકો દ્વારા પોલીસ સમક્ષ કડક કાર્યવાહી કરવામાં આવે તેવી માંગ કરવામાં આવી છે. જોકે રાત્રિના સમયે બનેલ ઘટનામાં પોલીસે કાર્યવાહી આદરી છે.