અમદાવાદમાં ટ્રાફિક પોલીસની સ્પેશ્યલ ડ્રાઇવ, ટ્રાફિક નિયમોનુ કરજો પાલન, નહીતર...

અમદાવાદ શહેર ટ્રાફિક પોલીસે 3 દિવસ માટે સીટબેલ્ટ પહેરવા અંગે ખાસ ડ્રાઈવ શરૂ કરી છે. આ ડ્રાઈવનો હેતુ કારમાં બેઠેલા તમામ વ્યક્તિઓને ફરજીયાત સીટ બેલ્ટ પહેરવા અંગે જાગૃતિ આવે તે માટેનો હશે. પોલીસ અધિકારીનું કહેવું છે કે, દંડની વસૂલાત માટે હાલ કોઈ સૂચના નથી પણ પોતાની સુરક્ષા એ વાહન ચાલકની જવાબદારી હોવાથી ત્રણ દિવસની ઝૂંબેશમાં માત્ર સમજાવટ કરવામાં આવશે.

ઉલ્લેખનીય છે કે તાજેતરમાં જ ટાટા ગ્રુપના પૂર્વ ચેરમેન સાયરસ મિસ્ત્રીનું અકસ્માતમાં મોત થતાં શહેર પોલીસે આ બીડું ઝડપ્યું છે. મુંબઈ-અમદાવાદ હાઈવે પર ટાટા સન્સના પૂર્વ ચેરમેન સાયરસ મિસ્ત્રીનું કાર અકસ્માતમાં મૃત્યુ થયું હતું. પ્રાથમિક તપાસમાં પોલીસ અકસ્માતનું કારણ ઓવરસ્પીડ અને રોંગ સાઇડથી ઓવરટેક હોવાનું માની રહી છે. એવું પણ કહેવામાં આવી રહ્યું છે કે, પાછળ બેસેલા સાયરસ મિસ્ત્રીએ સીટ બેલ્ટ બાંધ્યો ન હતો.

કેન્દ્રીય મોટર વાહન નિયમ (1989)ની કલમ 138(3) અનુસાર કારમાં સીટ બેલ્ટ આપવામાં આવે છે અને તે દરેક કાર ચાલકે ખાસ કરીને આગળની સીટ પર બેઠેલી વ્યક્તિએ સીટ બેલ્ટ લગાડવો જરૂરી છે. સાથે જ 5 સીટર કારમાં પાછળ બેસતા લોકોને સીટ બેલ્ટ પહેરવો જરૂરી છે. મહત્વ ની વાત તો એ છે કે ટ્રાફિક પોલીસ અવાર નવાર ટ્રાફિક નિયમને લઈ કાર્યવાહી કરતી હોય છે અને ડ્રાઇવ પણ કરતી હોય છે પંરતુ થોડા દિવસ સુધી નિયમ નું પાલન થાય છે અને થોડા દિવસ બાદ પરિસ્થિતિ એવીજ થઈ જાય છે. ત્યારે આ વખતે ઉદ્યોગપતિના મોત બાદ સીટ બેલ્ટ ને લઈ અમદાવાદ ટ્રાફિક પોલીસ દ્વારા એક ડ્રાઇવ શરૂ કરવામાં આવી રહ્યું છે અને સીટ બેલ્ટ કેમ ઉપયોગી છે તેની જાણ કરવામાં આવશે.

ઉલ્લેખનિય છે કે, ગઇકાલે કેન્દ્રીય મંત્રી નીતિન ગડકરીએ જણાવ્યું હતું કે, સરકાર વ્હિકલ નિર્માતાઓ માટે પાછળની સીટો માટે પણ સીટ બેલ્ટ એલાર્મ સિસ્ટમ મૂકવી ફરજિયાત બનાવવાની યોજના બનાવી રહી છે. હાલમાં તમામ વાહન ઉત્પાદકો માટે માત્ર આગળની સીટના મુસાફરો માટે જ સીટ બેલ્ટ રિમાઇન્ડર આપવાનું ફરજિયાત છે. એક કાર્યક્રમ દરમિયાન ગડકરીએ કહ્યું કે, કાર અકસ્માતમાં સાયરસ મિસ્ત્રીના નિધન બાદ અમે નિર્ણય લીધો છે કે વાહનોમાં પાછળની સીટો માટે સીટ બેલ્ટ બીપ સિસ્ટમ પણ હશે. તેમણે કહ્યું કે, બધા માટે સીટ બેલ્ટ પહેરવો ફરજિયાત રહેશે. સાથે જ આ નિયમનું ઉલ્લંઘન કરનારાઓને દંડ ફટકારવામાં આવશે. સીટ બેલ્ટ ન પહેરવા બદલ ચલણને મંજૂરી આપવામાં આવશે. આ આદેશને 3 દિવસની અંદર લાગુ કરવામાં આવશે.

English summary

Special drive of traffic police in Ahmedabad, follow traffic rules, Otherwise...