અમિત શાહને સુપ્રીમ કોર્ટમાં રાહત મળી, ધરપકડ મોકૂફ

નવી દિલ્હી, 8 એપ્રિલ : ગુજરાતના પૂર્વ ગૃહમંત્રી અને મુખ્યમંત્રી નરેન્દ્ર મોદીના અંગત ગણાતા અને ભાજપનાં રાષ્ટ્રીય મહાસચિવ અમિત શાહને સુપ્રીમ કોર્ટ તરફથી આજે સોમવારે રાહત મળી છે. હવેથી તુલસી પ્રજાપતિ કેસ અને સોહરાબુદ્દીન એનકાઉન્ટર કેસ એક સાથે ચાલશે એમ સુપ્રીમ કોર્ટે જણાવ્યું છે. આ ઉપરાંત સુપ્રીમે સોહરાબુદ્દીન કેસમાં મળેલા અમિત શાહના જામીનને યથાવત રાખ્યાં છે. બીજી તરફ સીબીઆઈએ પણ જણાવ્યું છે કે અમિત શાહને હવે જામીન મળતા તેમની ધરપકડ નહીં થઈ શકે.

ગુજરાતના પૂર્વ ગૃહમંત્રી અમિત શાહની સામે સુપ્રીમ કોર્ટે તુલસી પ્રજાપતિ કેસમાં અલગથી એફઆઈઆર દાખલ કરવાની જરૂરિયાત ન હોવાનું જણાવ્યું છે, અને કહ્યું છે કે, પ્રજાપતિ કેસની એફઆઈઆરને સોહરાબુદ્દીન શેખ નકલી એન્કાઉન્ટર કેસની પૂરક એફઆઈઆર જ ગણવી અને એક જ ખટલો ચલાવવો.

ઉલ્લેખનીય છે કે, અમિત શાહનાં વકીલ રામ જેઠમલાણી છે. રામ જેઠમલાણીએ સુપ્રીમ કોર્ટમાં એવું જણાવ્યું હતું કે, સીબીઆઈએ જે તુલસીરામ કેસની એફઆઈઆર દાખલ કરી છે તે બદઈરાદાપૂર્વકની છે, તેને પૂરક ગણવી, કેમ કે બંને એન્કાઉન્ટર્સ (તુલસી પ્રજાપતિ, સોહરાબુદ્દીન) એકબીજા સાથે સંકળાયેલા છે, જોકે, સીબીઆઈએ દાવો કર્યો હતો કે બંને એન્કાઉન્ટર અલગ અલગ હતા, પંરતુ જેઠમલાણીની દલીલ સામે સોમવારે સુપ્રીમ કોર્ટે બંને એન્કાઉન્ટર્સ એકબીજા સાથે સંકળાયેલા હોવાનું જણાવી બંને કેસ એકસાથે ચલાવવાનો આદેશ આપ્યો છે.

English summary

Amit Shah got relief from SC, arrest postponed.