Bahial Demolition : ગાંધીનગરના બહિયલમાં હિંસક અથડામણ બાદ ગેરકાયદે બાંધકામો પર બુલડોઝર ફેરવાયુ

Bahial Demolition : તાજેતરમાં થયેલી હિંસક જૂથ અથડામણ બાદ ગાંધીનગર જિલ્લાના બહિયલ ગામમાં વહીવટી તંત્ર દ્વારા એક મોટી કાર્યવાહી હાથ ધરવામાં આવી છે.

કાયદો અને વ્યવસ્થા જાળવવા તથા અસામાજિક તત્વો પર લગામ કસવાના ભાગરૂપે તંત્રએ બહિયલમાં મેગા ડિમોલિશન ડ્રાઇવ ચલાવી છે.

અહેવાલો અનુસાર, વહીવટી તંત્રએ આ અથડામણમાં સામેલ આરોપીઓ અને અન્ય અસામાજિક તત્વોના ગેરકાયદે દબાણો પર બુલડોઝર ફેરવ્યું છે. આ ડિમોલિશન ડ્રાઇવમાં કુલ ૧૮૬ જેટલા ગેરકાયદે એકમોને ધ્વસ્ત કરવાની કાર્યવાહી શરૂ કરવામાં આવી છે.

તંત્રના અધિકારીઓ અનુસાર, આ ગેરકાયદેસર બાંધકામો અંગે અગાઉ પણ તંત્ર દ્વારા નિયમાનુસાર નોટિસ પાઠવવામાં આવી હતી. જો કે, આ નોટિસોની અવગણના થતાં અને તાજેતરમાં નવરાત્રિના સમયમાં થયેલી હિંસક ઘટનામાં આ તત્વોની સંડોવણીને ધ્યાનમાં રાખીને આ કડક પગલું લેવામાં આવ્યું છે.

બહિયલ ગામમાં થયેલી અથડામણમાં અસામાજિક તત્વો દ્વારા પથ્થરમારો, આગચંપી કરીને મોટા પાયે અરાજકતા ફેલાવવામાં આવી હતી. રાજ્યમાં શાંતિ અને સૌહાર્દ જળવાઈ રહે તે હેતુથી તેમજ ગેરકાયદે પ્રવૃત્તિઓને રોકવા માટે તંત્રએ કાયદાનું પાલન ન કરનારા તત્વો સામે આ સખત પગલું લીધું છે.

સમગ્ર ડિમોલિશનની કાર્યવાહી દરમિયાન કોઈ અનિચ્છનીય બનાવ ન બને તે માટે વિસ્તારમાં ચુસ્ત પોલીસ બંદોબસ્ત ગોઠવવામાં આવ્યો છે. વહીવટી તંત્રની આ કાર્યવાહી એ સંદેશ આપે છે કે, રાજ્યમાં શાંતિ ભંગ કરનારા કે કાયદાનું ઉલ્લંઘન કરનારા કોઈપણ તત્વોને બક્ષવામાં આવશે નહીં.

English summary

Bahiyal Demolition: Illegal Structures Bulldozed in Gandhinagar Following Violent Clashes