Gujarat Police: પોલીસ ભરતીને લઈ સૌથી મોટા સમાચાર, PSI-LRDની શારીરિક કસોટીની તારીખ જાહેર

By Desk

Updated: Saturday, January 3, 2026, 18:29 [IST]

Gujarat Police Recruitment 2026: ગુજરાત પોલીસમાં જોડાવાનું સપનું જોતા લાખો યુવાનો માટે આજે સૌથી મોટા સમાચાર સામે આવ્યા છે. ગુજરાત પોલીસ ભરતી બોર્ડ દ્વારા લોકરક્ષક દળ (LRD) અને પોલીસ સબ ઇન્સ્પેક્ટર (PSI) ની સંયુક્ત શારીરિક કસોટીની સત્તાવાર તારીખ જાહેર કરી દેવામાં આવી છે. આગામી 21 જાન્યુઆરી 2026થી રાજ્યભરના નિર્ધારિત મેદાનો પર આ કસોટીનો પ્રારંભ થશે.

13,591 જગ્યાઓ માટે 14 લાખથી વધુની સ્પર્ધા

રાજ્ય સરકાર દ્વારા પોલીસ વિભાગની કુલ 13,591 ખાલી જગ્યાઓ ભરવા માટે આ મેગા ભરતીનું આયોજન કરવામાં આવ્યું છે. આ પદો માટે રાજ્યભરમાંથી અંદાજે 14 લાખથી વધુ ઉમેદવારોએ અરજી કરી છે, જે દર્શાવે છે કે આ વખતે મેદાનમાં ભારે રસાકસી જોવા મળશે.

ગુજરાત પોલીસ ભરતી બોર્ડની જાહેરાત ક્રમાંકઃ GPRB/202526/1 અન્વયે પો.સ.ઇ. કેડર અને લોકરક્ષક કેડરની શારીરિક કસોટી તા.૨૧/૦૧/૨૦૨૬ના રોજથી શરૂ થનાર છે. જેના કોલલેટર ડાઉનલોડ કરવા અંગેની વિગતો હવે પછી જણાવવામાં આવશે. જેની ઉમેદવારોએ નોંધ લેવી.
— Gujarat Police Recruitment Board Official (@GPRB_GNR) January 3, 2026

શારીરિક કસોટીની મુખ્ય વિગતો

ક્યારથી શરૂ થશે: 21 જાન્યુઆરી 2026 થી.
કોનો સમાવેશ: PSI કેડર અને LRD કેડર (બંને માટે સંયુક્ત કસોટી).
પદ્ધતિ: આ વખતે દોડમાં પારદર્શિતા જાળવવા માટે RFID ચીપ અને સીસીટીવી કેમેરાનો ઉપયોગ કરવામાં આવશે.
કોલ લેટર: ઉમેદવારો ટૂંક સમયમાં જ ઓજસ (OJAS) ની સત્તાવાર વેબસાઇટ પરથી પોતાના કોલ લેટર ડાઉનલોડ કરી શકશે.

કસોટીના ધોરણો

ભરતી બોર્ડના નિયમો મુજબ, શારીરિક કસોટીમાં દોડના અંતર અને સમય નીચે મુજબ રહેશે.

પુરુષ ઉમેદવારો: 5000 મીટરની દોડ (મહત્તમ 25 મિનિટમાં).
મહિલા ઉમેદવારો: 1600 મીટરની દોડ (મહત્તમ 9 મિનિટ 30 સેકન્ડમાં).
માજી સૈનિકો: 2400 મીટરની દોડ (મહત્તમ 12 મિનિટ 30 સેકન્ડમાં).

તૈયારીઓ તેજ બની

તારીખોની જાહેરાત થતા જ રાજ્યના ખૂણેખૂણે પ્રેક્ટિસ કરી રહેલા ઉમેદવારોમાં નવો ઉત્સાહ જોવા મળી રહ્યો છે. હવે જ્યારે પરીક્ષામાં માત્ર ગણતરીના દિવસો બાકી છે, ત્યારે ઉમેદવારોએ અંતિમ તબક્કાની તૈયારીઓ માટે એડીચોટીનું જોર લગાવ્યું છે. ભરતી બોર્ડે ઉમેદવારોને અફવાઓથી દૂર રહી માત્ર સત્તાવાર જાહેરાતો પર જ ધ્યાન આપવા અપીલ કરી છે.