Gujarat News: ગુજરાતના 41 રોડના કામ માટે કેન્દ્ર સરકારે 1078 કરોડ મંજૂર કર્યા
Gujarat News: ગુજરાતમાં રોડ ઈન્ફ્રાસ્ટ્રક્ચરને વધુ મજબૂત બનાવવા માટે કેન્દ્ર સરકાર તરફથી મોટી ભેટ મળી છે. ભારત સરકારના સેન્ટ્રલ રોડ ઇન્ફ્રાસ્ટ્રક્ચર ફંડ (CRIF) માંથી ગુજરાતના વિવિધ 41 માર્ગોના કામો માટે કુલ ₹1078.13 કરોડની માતબર રકમ મંજૂર કરવામાં આવી છે. આ ફંડ દ્વારા રાજ્યના વિવિધ જિલ્લાઓમાં કનેક્ટિવિટી અને પરિવહનની સુવિધા વધુ સુદ્રઢ બનશે.
આ ફંડની ફાળવણી પાછળ ગત નવેમ્બર-2025માં CM ભૂપેન્દ્ર પટેલ અને કેન્દ્રીય માર્ગ પરિવહન મંત્રી નીતિન ગડકરી વચ્ચે ગાંધીનગરમાં યોજાયેલી ઉચ્ચ સ્તરીય બેઠક મહત્વની રહી છે. આ બેઠકમાં રાજ્યના નેશનલ હાઈવે અને સ્ટેટ હાઈવેના પડતર પ્રશ્નોની સમીક્ષા કરવામાં આવી હતી, જેના પરિણામ સ્વરૂપે હવે આ રકમ જાહેર કરવામાં આવી છે.
પ્રોજેક્ટની વિગતો અને આંકડાકીય માહિતી
મંજૂર કરાયેલી આ રકમ દ્વારા કુલ 564.57 કિલોમીટર લંબાઈના માર્ગોનું નવીનીકરણ અને મજબૂતીકરણ કરવામાં આવશે.
કામગીરીનો પ્રકાર | પ્રોજેક્ટની સંખ્યા | કુલ લંબાઈ (કિમી) | મંજૂર રકમ (કરોડમાં)
સ્ટેટ હાઈવે વાઈડનીંગ (પહોળા કરવા) | 11 | 229.20 | ₹636.00
મજબૂતીકરણ અને રીસર્ફેસિંગ | 23 | 335.37 | ₹408.33
સ્ટ્રક્ચરના કામો | 07 | - | ₹33.80
કયા જિલ્લાઓને મળશે આ યોજનાનો લાભ?
1. રોડ વાઈડનીંગ (પહોળા કરવા): પાટણ, કચ્છ, બનાસકાંઠા, ખેડા, મહીસાગર, છોટાઉદેપુર, વલસાડ, અમરેલી, જામનગર અને વડોદરા જિલ્લાઓમાં સ્ટેટ હાઈવેને પહોળા કરવામાં આવશે.
2. મજબૂતીકરણ અને રીસર્ફેસિંગ: અમદાવાદ, ખેડા, આણંદ, અરવલ્લી, મહીસાગર, તાપી, નવસારી, દેવભૂમિ દ્વારકા, સુરેન્દ્રનગર, અમરેલી, સુરત અને જામનગર જિલ્લાના રસ્તાઓનું નવીનીકરણ થશે.
3. સ્ટ્રક્ચરના કામો (પુલ/નાળા): તાપી, સુરત અને ડાંગ જિલ્લામાં માર્ગો પરના સ્ટ્રક્ચરના કામો માટે ફંડ ફાળવાયું છે.
પીએમ ગતિશક્તિને મળશે વેગ
PM નરેન્દ્ર મોદીના 'પીએમ ગતિશક્તિ' વિઝન હેઠળ આ રકમ ફાળવવામાં આવી છે. જેનાથી ગુજરાતમાં લોજિસ્ટિક્સ પરિવહન ઝડપી બનશે અને લોકોની મુસાફરી વધુ સરળ અને સુરક્ષિત થશે. ખાસ કરીને આદિવાસી અને સરહદી જિલ્લાઓના માર્ગો સુધરવાથી આર્થિક પ્રવૃત્તિઓને પણ વેગ મળશે.
Click it and Unblock the Notifications
Sign in with Google
