Gujarat Budget 2026: ગામડાં બનશે સ્માર્ટ, પંચાયત વિભાગ માટે ₹14,858 કરોડની જોગવાઈ

By Desk

Published: Wednesday, February 18, 2026, 19:52 [IST]

Gujarat Budget 2026: ગુજરાતના ગામડાંઓને આધુનિક અને આત્મનિર્ભર બનાવવાના લક્ષ્ય સાથે રાજ્ય સરકારે વર્ષ 2026-27ના બજેટમાં પંચાયત અને ગ્રામ વિકાસ વિભાગ માટે ₹14,858 કરોડનું માતબર ભંડોળ ફાળવ્યું છે. આ બજેટમાં ગ્રામીણ આવાસ, મહિલા સશક્તિકરણ અને સ્વચ્છતા પર વિશેષ ધ્યાન કેન્દ્રિત કરીને છેવાડાના માનવીની સુખાકારી વધારવાનો પ્રયાસ કરવામાં આવ્યો છે.

આવાસ યોજના: 1.60 લાખ પરિવારોનું ઘરનું સ્વપ્ન થશે સાકાર

"સૌને આવાસ" ના સંકલ્પને વેગ આપવા માટે સરકારે ગ્રામીણ આવાસ યોજનાઓમાં મોટી જોગવાઈ કરી છે:

PM આવાસ યોજના (ગ્રામીણ): આ યોજના માટે કુલ ₹1,755 કરોડ ફાળવવામાં આવ્યા છે.
નવા આવાસો: આગામી વર્ષમાં રાજ્યના ગ્રામીણ વિસ્તારોમાં 1.60 લાખ નવા ઘર બનાવવાનું લક્ષ્ય રાખવામાં આવ્યું છે.
વધારાની સહાય: કેટેગરી-એ ના લાભાર્થીઓને ટોપ-અપ સહાય તરીકે રાજ્ય સરકાર તરફથી વધારાના ₹90 કરોડની ફાળવણી કરાઈ છે.

સ્વચ્છતા અને માળખાગત સુવિધાઓ

ગામડાંઓને શહેરો જેવી સુવિધા અને સ્વચ્છતા આપવા માટે 'મુખ્યમંત્રી નિર્મળ ગ્રામ યોજના' અમલી બનશે:

નિર્મળ ગ્રામ યોજના: ગ્રામીણ સ્વચ્છતા માટે ₹650 કરોડની જોગવાઈ.
ગંદા પાણીનો નિકાલ: 400 ગામોના ગંદા પાણીને તળાવોમાં જતું અટકાવવા અને તેને શુદ્ધ કરવા (ગ્રે-વોટર ટ્રીટમેન્ટ) માટે ₹50 કરોડ ફાળવાયા છે.
સામૂહિક શૌચાલય: સામૂહિક શૌચાલય નિર્માણ માટેની સહાયમાં ₹2 લાખનો વધારો કરવામાં આવ્યો છે.
અટલવાડી યોજના: ગામડાંઓમાં સામાજિક પ્રસંગો અને મીટિંગો માટે મલ્ટીપર્પઝ માળખું ઊભું કરવા ₹60 કરોડ ખર્ચાશે.

નારી શક્તિ: 'લખપતિ દીદી' અને મહિલા રોજગાર

ગ્રામીણ બહેનોને આર્થિક રીતે પગભર કરવા માટે 'મિશન મંગલમ' હેઠળ વિશેષ આયોજન છે:

લખપતિ દીદી: સ્વ-સહાય જૂથની બહેનોને પ્રોત્સાહન અને વ્યાજ સહાય માટે ₹47 કરોડ.
ગ્રામ હાટ: મહિલાઓ દ્વારા તૈયાર કરાયેલી ચીજવસ્તુઓના વેચાણ માટે કાયમી બજાર ઉપલબ્ધ કરાવવા ₹20 કરોડના ખર્ચે 'ગ્રામ હાટ' ઉભા કરાશે.

રોજગાર ગેરંટી: VB-GRAM G મિશન

ગ્રામીણ વિસ્તારોમાં આજીવિકાના સાધનો વધારવા માટે સરકારે VB-GRAM G (વિકસિત ભારત ગેરંટી ફોર રોજગાર એન્ડ આજીવિકા મિશન) હેઠળ ₹1,500 કરોડનું વિશાળ બજેટ ફાળવ્યું છે. આ યોજનાથી ગામડાંઓમાં મોટાપાયે રોજગારીની તકો ઊભી થશે.

બજેટની મુખ્ય હાઈલાઈટ્સ