Gujarat: ભરઉનાળે અષાઢી માહોલ, સૌરાષ્ટ્ર-કચ્છમાં કમોસમી વરસાદ, ખેડૂતોના હાલ બેહાલ
Unseasonal Rain in Gujarat: ગુજરાતમાં કાળઝાળ ગરમીની વચ્ચે હવામાનમાં આવેલા ઓચિંતા પલટાએ હાહાકાર મચાવ્યો છે. સૌરાષ્ટ્ર અને કચ્છના અનેક જિલ્લાઓમાં મેઘરાજાએ ઉનાળામાં ચોમાસાની યાદ અપાવી દીધી છે. જામનગર, દ્વારકા, રાજકોટ અને કચ્છમાં ભારે પવન અને ગાજવીજ સાથે ખાબકેલા વરસાદે જનજીવન અસ્તવ્યસ્ત કરી દીધું છે, જ્યારે શિવરાજપુર બીચ પર કુદરતે રૌદ્ર સ્વરૂપ ધારણ કર્યું હતું.
શિવરાજપુર બીચ પર મિની વાવાઝોડું: સહેલાણીઓમાં નાસભાગ
દ્વારકાના જગપ્રખ્યાત શિવરાજપુર બીચ પર કુદરતી આફત ત્રાટકી હોય તેવા દ્રશ્યો સર્જાયા હતા. અચાનક ફૂંકાયેલા અતિભારે પવન અને મિની વાવાઝોડા જેવી સ્થિતિને કારણે બીચ પર ફરવા આવેલા પ્રવાસીઓમાં ભારે નાસભાગ મચી ગઈ હતી. પવનની ગતિ એટલી તેજ હતી કે બીચ પર પ્રવાસી સુવિધાઓને મોટું નુકસાન પહોંચ્યું છે. આકાશમાં કાળાડિબાંગ વાદળો અને વીજળીના કડાકા સાથે થયેલા વરસાદે ઉનાળામાં ભયાનક માહોલ સર્જ્યો હતો.
જામનગર-ખંભાળિયા હાઈવે પર વિઝિબિલિટી ઘટી
જામનગર ગ્રામ્ય પંથક અને ખંભાળિયા હાઈવે પર પણ મેઘરાજાની તોફાની એન્ટ્રી થઈ છે. ભારે પવન સાથે ખાબકેલા વરસાદને કારણે હાઈવે પર વાહનચાલકોને ભારે હાલાકીનો સામનો કરવો પડ્યો હતો. વરસાદ એટલો જોરદાર હતો કે વિઝિબિલિટી ઓછી થઈ જતાં વાહનો થંભી ગયા હતા. જામનગર જિલ્લાના ગ્રામ્ય વિસ્તારોમાં પણ પવન સાથે વરસાદી ઝાપટાં પડ્યાના અહેવાલ છે.
રાજકોટમાં કરા અને કચ્છમાં ધૂળની ડમરીઓ
માત્ર જામનગર જ નહીં, રાજકોટમાં પણ કરા સાથે કમોસમી વરસાદ પડ્યો છે. બીજી તરફ કચ્છમાં અંદાજે 50 કિમીની ઝડપે ફૂંકાયેલા પવને ધૂળની ડમરીઓ ઉડાડી જનજીવન પ્રભાવિત કર્યું હતું. સમગ્ર સૌરાષ્ટ્ર-કચ્છમાં ઉનાળાની ગરમી વચ્ચે ઠંડક તો પ્રસરી છે, પરંતુ આ 'માવઠું' આફત બનીને આવ્યું છે.
ખેડૂતોનો મોંમાં આવેલો કોળિયો છીનવાશે?
હવામાન વિભાગની આગાહી વચ્ચે વરસેલા આ કમોસમી વરસાદે જગતના તાતની ચિંતામાં મોટો વધારો કર્યો છે. હાલ ખેતરોમાં ઉનાળુ પાક તૈયાર છે. આ પાકોને વરસાદ અને તેજ પવનથી વ્યાપક નુકસાન થવાની ભીતિ સેવાઈ રહી છે. ખેડૂતોને ડર છે કે મોંમાં આવેલો કોળિયો કુદરત છીનવી લેશે. વારંવાર બદલાતા હવામાનને કારણે ખેતીના ગણિતો ઊંધા પડ્યા છે.
Click it and Unblock the Notifications
Sign in with Google
