ગુજરાતમાં હાડ થીજવતી ઠંડી, રાજ્યનું સૌથી ઠંડુ શહેર બન્યું નલિયા, જાણો તમારા શહેરની સ્થિતિ

Gujarat Weather: રાજ્યમાં છેલ્લા બે દિવસથી ઠંડીના જોરમાં નોંધપાત્ર વધારો થયો છે. ઉત્તર-પૂર્વ દિશામાંથી ફૂંકાતા બરફીલા પવનોને કારણે સમગ્ર ગુજરાત ઠુંઠવાયું છે. હવામાન વિભાગના જણાવ્યા અનુસાર, પવનની ગતિ 15થી 20 કિમી પ્રતિ કલાક રહેતા વહેલી સવારે અને મોડી રાત્રે કડકડતી ઠંડીનો અનુભવ થઈ રહ્યો છે.

નલિયા ફરી એકવાર બન્યું 'કોલ્ડ સ્ટોરેજ'

રાજ્યમાં સૌથી ઓછું તાપમાન કચ્છના નલિયામાં 7.5 ડિગ્રી નોંધાયું છે. આ સિવાય રાજ્યના અન્ય શહેરોમાં પણ લઘુતમ તાપમાનમાં 1થી 2 ડિગ્રીનો ઘટાડો જોવા મળ્યો છે.

મુખ્ય શહેરોના તાપમાન પર એક નજર:

• નલિયા: 7.5°C
• કંડલા: 10.7°C
• ડીસા: 11.0°C
• ગાંધીનગર: 11.2°C
• રાજકોટ/ભુજ: 11.4°C
• અમદાવાદ: 13.4°C
• વડોદરા: 13.6°C

આ વર્ષે શિયાળો કેમ મોડો અને નરમ રહ્યો?

ઘણા લોકોને પ્રશ્ન છે કે ડિસેમ્બર વીતી ગયો હોવા છતાં આ વખતે પહેલા જેવી ઠંડી કેમ નથી? હવામાન નિષ્ણાતો આ માટે મુખ્ય ત્રણ કારણો ગણાવે છે.

• વેસ્ટર્ન ડિસ્ટર્બન્સનો અભાવ: હિમાલયમાં આ વર્ષે મજબૂત પશ્ચિમી વિક્ષેપ સર્જાયા નથી, જેને કારણે પહાડો પર હિમવર્ષા ઓછી થઈ છે.
• અલ-નિનોની અસર: પ્રશાંત મહાસાગરમાં તાપમાન વધવાને કારણે વૈશ્વિક સ્તરે શિયાળો હુંફાળો રહ્યો છે.
• ગ્લોબલ વોર્મિંગ: સતત વધી રહેલા પ્રદૂષણ અને પર્યાવરણમાં ફેરફારને કારણે શિયાળાના દિવસોમાં પણ ગરમી અને ઉકળાટનો અનુભવ થઈ રહ્યો છે.
• આંકડાકીય તુલના: ગત વર્ષે (2024) ડિસેમ્બરમાં નલિયામાં 22 દિવસ તાપમાન 10 ડિગ્રીથી નીચે રહ્યું હતું, જ્યારે આ વર્ષે માત્ર 4 જ દિવસ પારો 10થી નીચે ગયો છે.

આગામી 5 દિવસ માટે IMDની આગાહી

ભારતીય હવામાન વિભાગ (IMD) મુજબ, આગામી 5 દિવસોમાં ઠંડીનું જોર હજુ વધશે. ઉત્તર ભારતના મેદાની પ્રદેશોમાં પારો 2થી 4 ડિગ્રી સુધી ગગડી શકે છે, જેની સીધી અસર ગુજરાત પર પડશે.

• કોલ્ડ ડે એલર્ટ: પંજાબ, હરિયાણા અને દિલ્હીમાં 'કોલ્ડ ડે' જેવી સ્થિતિ રહેશે.
• ધુમ્મસની ચેતવણી: બિહાર અને ઉત્તર પ્રદેશમાં સવારના સમયે ગાઢ ધુમ્મસને કારણે વિઝિબિલિટી ઓછી રહેશે.
• ગુજરાતમાં અસર: આગામી દિવસોમાં રાત્રિના તાપમાનમાં હજુ પણ ઘટાડો થવાની અને શીતલહેર ફૂંકાવાની શક્યતા છે.

English summary

A severe cold wave grips Gujarat as temperatures dip by 2-4°C across the state. Naliya records 7°C while winds blow at 20kmph. Check the 5-day IMD weather forecast for Ahmedabad and Rajkot.