Gujarat Weather: રાજ્યમાં ભર ઉનાળે કમોસમી વરસાદની આગાહી, નોંધી લેજો આ તારીખ

By Desk

Published: Saturday, March 14, 2026, 9:53 [IST]

Gujarat Weather: ગુજરાતમાં ગરમીના પ્રકોપ વચ્ચે હવે વાતાવરણમાં મોટો પલટો આવવાની શક્યતા છે. એક તરફ સૂર્યદેવ આકરા મિજાજમાં છે, ત્યારે બીજી તરફ હવામાન વિભાગે રાજ્યના અનેક વિસ્તારોમાં કમોસમી વરસાદ એટલે કે માવઠાની આગાહી કરીને ખેડૂતો અને નાગરિકોની ચિંતામાં વધારો કર્યો છે.

ક્યારે અને ક્યાં પડી શકે છે વરસાદ?

હવામાન વિભાગના જણાવ્યા અનુસાર, આગામી 18 અને 19 માર્ચ દરમિયાન રાજ્યમાં વરસાદી માહોલ જોવા મળી શકે છે.

18 માર્ચ: કચ્છ, બનાસકાંઠા અને પાટણ જેવા સરહદી જિલ્લાઓમાં હળવા વરસાદની શક્યતા છે.
19 માર્ચ: ઉત્તર ગુજરાત અને સૌરાષ્ટ્રના અનેક જિલ્લાઓમાં કમોસમી વરસાદ થઈ શકે છે. જેમાં ખાસ કરીને રાજકોટ, બોટાદ, ભાવનગર, અમરેલી અને ગીર સોમનાથનો સમાવેશ થાય છે.
દક્ષિણ ગુજરાત: સુરત, ભરૂચ, નર્મદા અને તાપી જિલ્લામાં પણ વાદળછાયું વાતાવરણ અને હળવા વરસાદની આગાહી કરવામાં આવી છે.

ચાલુ વર્ષે માર્ચ મહિનામાં જ મે મહિના જેવી ગરમીનો અનુભવ થઈ રહ્યો છે. સામાન્ય રીતે માર્ચમાં તાપમાન આટલું ઊંચું હોતું નથી, પરંતુ આ વર્ષે પારો સામાન્ય કરતા 7થી 13 ડિગ્રી જેટલો વધુ નોંધાયો છે. છેલ્લા કેટલાક દિવસોથી રાજ્યના મુખ્ય શહેરોમાં તાપમાન નીચે મુજબ નોંધાયું છે:

ખાસ કરીને ઉત્તર ગુજરાતમાં પારો 41 ડિગ્રીને પાર કરી ગયો છે, જેના કારણે ડીસામાં 'ઓરેન્જ એલર્ટ' પણ જાહેર કરવામાં આવ્યું હતું.

કેમ વધી રહી છે આટલી ગરમી?

હવામાન નિષ્ણાતોના મતે, ગુજરાત અને તેની આસપાસના વિસ્તારોમાં સર્જાયેલી 'એન્ટિસાયક્લોનિક સર્ક્યુલેશન' સિસ્ટમને કારણે તાપમાનમાં આકરો વધારો જોવા મળી રહ્યો છે. દરિયાઈ પવનોની ગતિ ધીમી પડતા અને સૂકા પૂર્વીય પવનો ફૂંકાવાને કારણે ગરમીનો પ્રકોપ વધ્યો છે. જોકે, હવે વાદળછાયું વાતાવરણ સર્જાતા ગરમીમાં આંશિક રાહત મળવાની આશા છે.

એપ્રિલ-મેમાં કેવી રહેશે સ્થિતિ?

માર્ચની શરૂઆતમાં જ જે રીતે યલો અને ઓરેન્જ એલર્ટ આપવાની નોબત આવી છે, તેને જોતા લોકોમાં ચિંતા છે કે એપ્રિલ અને મે મહિનામાં ગરમીનો પારો ક્યાં પહોંચશે? અત્યારે બપોરના સમયે રસ્તાઓ સુમસામ જોવા મળી રહ્યા છે અને લોકો ઠંડા પીણાના સહારે ગરમીથી બચવા પ્રયાસ કરી રહ્યા છે.

Published On March 14, 2026