રૂપાણીના શહેરમાં હાર્દિક પટેલની મહાક્રાંતિ સભા, તૈયારીઓ શરૂ
હાર્દિક પટેલ ગુજરાત વિધાનસભાની ચૂંટણી પહેલા રૂપાણીના શહેર રાજકોટમાં મહાક્રાંતિ સભા કરવાનો છે. આ માટે તડામાર તૈયારીઓ ચાલી રહી છે. જાણો આ અંગે વધુ અહીં
પાસ લીડર હાર્દિક પટેલ હવે ભાજપ સરકાર સામે સામી છાતીએ લડી રહ્યો છે ત્યારે રાજકોટમાં આગામી 29મી નવેમ્બરના રોજ મહાક્રાંતિ સભાનું આયોજન કરવામાં આવ્યું છે. જેને લઈને રાજકોટ પાસ દ્વારા મોટા પાયે તૈયારી શરૂ કરી છે. જેમાં રાજકોટ માં 50થી વધારે સ્થળોએ મોટા હોર્ડિંગ લગાવવા માં આવ્યા છે તો 1000થી વધારે ઓટો રીક્ષાઓમાં પણ બેનર લગાવવામાં આવ્યા છે. હાર્દિક ની સભાની તૈયારી એક મોટી પોલિટીકલ પાર્ટીની સભાની જેમ કરવામાં આવી છે. જેને લીધે ભાજપના નેતાઓ પણ ચોંકી ગયા છે. કારણ કે હાર્દિક પટેલ 150 રિંગ રોડ નાના મૌવા ચોકડી પાસે સભાનું સંબોધન કરવાનો છે.તે વિસ્તાર ભાજપનો ગઢ ગણાય છે અને ભાજપને ડર છે કે જો હાર્દિકની સભામાં પાસના ધાર્યા મુજબ પાટીદારો ઉમટે તો પબ્લિમાં ભાજપ માટે નકારાત્મક સંકેત મળી શકે તેમ છે.
રાજકોટ પાસના કન્વીનર બ્રિજેશ પટેલે જણાવ્યું કે પાસ માટે આ મહત્વ ની સભા છે અને એક અંદાજ મુજબ 3 લાખથી વધારે લોકો રાજકોટ અને સમગ્ર સૌરાષ્ટ્રમાંથી આ સભામાં ભાગ લેવા આવનાર છે. ભાજપ માટે આ ચૂંટણી એક પડકાર બની ગઈ છે અને હવે 22 વર્ષના શાસનને પ્રજા જાકારો આપવાની છે ત્યારે હવે આ ચૂંટણી ભાજપ વિરુદ્ધ ગુજરાતની પ્રજાની છે.
બ્રિજેશ પટેલે વધુમાં જણાવ્યું કે હાર્દિકને જીએમડીસી સભા બાદ થયેલા તોફાનો માટે જવાબદાર ગણાવવા માં આવ્યો હતો ત્યારે ફરીથી તેમને શંકા છે કે રાજકોટ માં પણ ભાજપ તોફાનો કરાવી હાર્દિક પટેલ અને પાસને જવાબદાર ઠેરવી શકે તેમ છે. જો આ સ્થિતિ નું નિર્માણ થશે તો ભાજપ સરકાર જવાબદાર રહેશે. બીજી તરફ પોલીસે પણ કાયદો અને વ્યવસ્થા જાળવવા માટે વિશેષ તૈયારી શરૂ કરી છે.