FB પર પત્નીને અશ્લીલ તસવીરો-વીડિયો મોકલતા શખ્સની ધરપકડ

અમદાવાદ: બનાવટી ફેસબૂક આઇડી પરથી પત્નીને અશ્લીલ તસવીરો અને વીડિયો મોકલતા પતિની ધરપકડ.

By Shachi

Updated: Sunday, July 9, 2017, 14:10 [IST]

અમદાવાદ શહેરમાં સાયબર ક્રાઇમની એક ચોંકાવનારી ઘટના બહાર આવી છે. પત્ની સાથે ઝગડો થતાં ચાંદખેડા વિસ્તારમાં રહેતા અને હોલસેલ દવાનો વેપાર કરતાં શખ્શે ફેસબૂક પર પત્નીને અશ્લીલ તસવીરો અને વીડિયો શેર કર્યા હતા. આ મામલે પત્નીએ શહેરના સાયબર સેલમાં ફરિયાદ નોંધાવતા આખો મામલો સામે આવ્યો છે અને આ શખ્સની ધરપકડ કરવામાં આવી છે.

પ્રાપ્ત માહિતી અનુસાર, લગભગ 13 વર્ષ પહેલાં આ શખ્સના લગ્ન અમરાઇવાડીમાં રહેતી એક યુવતી સાથે થયા હતા. તેમને બે પુત્રીઓ પણ છે. છેલ્લા થોડા સમયથી દંપતિ વચ્ચે ઘરેલુ બાબતે ઝગડા થતા હતા, 6 મહિના પહેલાં પત્ની ઝગડાથી કંટાળીને પિયર જતી રહી હતી. આ વાતનું વેર વાળવા શખ્સે સોશયિલ મીડિયા વેબસાઇટ ફેસબૂક એક ફેક એકાઉન્ટ બનાવ્યું હતું. આ બનાવટી એકાઉન્ટ પર તેણે પોતાની પત્ની અને સાસરીયાઓને અશ્લીલ તસવીરો અને વીડિયો મોકલ્યા હતા. આ ઓછું હોય તેમ, શખ્સે પોતાની જ પત્નીના ભાભીની તસવીરો અપલોડ કરતાં તેમને પ્રોસ્ટિટ્યૂટ તરીકે દર્શાવ્યા હતા.

આ મામલે શખ્સની પત્નીએ સાયબર સેલમાં ફરિયાદ નોંધાવી હતી. સાયબર સેલના કર્મચારીઓએ મહિલાએ આપેલ બે ફેસબૂક એકાઉન્ટની વિગતોને આધારે તપાસ હાથ ધરી હતી. તપાસમાં ગુનાઓ સાબિત થતાં એ શખ્સની ધરપકડ કરવામાં આવી છે.