આ મહિનાના અંતમાં માવઠા માટે તૈયાર રહો, જાણો નવી આગાહી

કમોસમી વરસાદના કહેર બાદ હવામાન નિષ્ણાત અંબાલાલ પટેલની નવી આગાહીથી ખેડૂતોની ચિંતામાં વધારો થયો છે. તેમણે રાજ્યમાં ફરી કમોસમી વરસાદની સંભાવના વ્યક્ત કરી છે, જેના કારણે ખેડૂતોને ફરી એકવાર પાકને નુકસાન થવાનો ભય સતાવી રહ્યો છે.

અંબાલાલ પટેલના અનુમાન મુજબ, નવેમ્બર મહિનાના અંતમાં માવઠું પડી શકે છે. ખાસ કરીને 28 નવેમ્બર આસપાસ કમોસમી વરસાદની ચેતવણી આપવામાં આવી છે. આ સમયગાળા દરમિયાન રાજ્યમાં વાદળછાયું વાતાવરણ જોવા મળશે અને છૂટોછવાયો વરસાદ પડી શકે છે.

બંગાળની ખાડીમાં એક સિસ્ટમ બનવાના કારણે રાજ્યના હવામાનમાં પલટો આવવાની શક્યતા છે. અંબાલાલ પટેલના મતે 22 નવેમ્બરથી વાતાવરણ બદલાવાનું શરૂ થશે અને આકાશ વાદળછાયું રહેશે. ડિસેમ્બરની શરૂઆતમાં પણ ચક્રવાત સર્જાઈ શકે છે.

તેમણે 20, 21 અને 22 નવેમ્બર દરમિયાન વાતાવરણમાં ફેરફાર થવાનો અંદાજ વ્યક્ત કર્યો છે. 18-19 નવેમ્બરે બંગાળના ઉપસાગરમાં હળવું દબાણ સર્જાશે, જે ડિસેમ્બરમાં પણ માવઠાની શક્યતા ઊભી કરી શકે છે.

ગુજરાતમાં ધીમે ધીમે ઠંડીનું પ્રમાણ વધી રહ્યું છે. રાજ્યના છ શહેરોમાં તાપમાન 15 ડિગ્રી સેલ્સિયસથી નીચે નોંધાયું છે. 10.9 ડિગ્રી સેલ્સિયસ સાથે દાહોદ સૌથી ઠંડું શહેર રહ્યું. હવામાન વિભાગે 25 નવેમ્બર પછી રાજ્યમાં ઠંડી વધવાની આગાહી કરી છે.

English summary

Weather expert Ambalal Patel predicts unseasonal rainfall in Gujarat, particularly around November 28, raising concerns among farmers. Changes in weather patterns are expected due to a system forming in the Bay of Bengal, increasing uncertainty for crop yields.