બસ અને ટ્રક વચ્ચે ટક્કર: 20ના મોત, 30 ઇજાગ્રસ્ત

ભોપાલ, 16 ઑક્ટોબર: મધ્યપ્રદેશના છત્તરપુર વિસ્તારમાં મંગળવાર સવારે એક દર્દનાક રોડ અકસ્માતમાં 20 લોકોના મોત નિપજ્યાં છે જ્યારે 30થી વધુ લોકો ઇજાગ્રસ્ત થયા છે. અકસ્માતની માહિતી મળતાં પોલીસે લાશો પર કબજો મેળવીને પોસ્ટમોર્ટમ માટે મોકલી આપી છે જ્યારે ઇજાગ્રસ્તને સારવાર માટે નજીકની હોસ્પિટલમાં ભરતી કરવામાં આવ્યાં છે. ડૉક્ટરોનું માનવું છે કે 20 લોકોની હાલત ગંભીર છે. બસ ઉંડી ખાણમાં પડી જતાં આ અકસ્માત સર્જાયો હતો. આશંકા વ્યક્ત કરવામાં આવી રહી છે કે મૃતકોના આંકડામાં વધારો થઇ શકે છે.

મળતી માહિતી મુજબ મધ્યપ્રદેશના છત્તરપુર જિલ્લાના નૌગાંવ પોલીસ મથકના વિસ્તારમાં મંગળવાર સવારે હરપાલ થી છત્તરપુર તરફ જઇ રહેલી બસ સામેથી સિમેન્ટ ભરીને આવેલા ટ્રક સાથે ટકરાઇ હતી. પૂરઝડપે આવી રહેલા ટ્રક સાથે બસની ટક્કર થતાં બસ ખીણમાં પડી ગઇ હતી.

પોલીસ સૂત્રોના જણાવ્યા અનુસાર આ અકસ્માતમાં 20 લોકોના મોત નિપજ્યાં છે. મૃતકોમાં 13 પુરૂષો અને 3 મહિલાઓનો સમાવેશ થાય છે. જ્યારે 30 લોકોની હાલત ગંભીર છે. બસમાં મુસાફરી કરેલા લોકોમાં મોટાભાગના મજૂરો હતા. મૃતકોના પરિવારજનોને 10-10 હજાર અને ઇજાગ્રસ્તોને પાંચ પાંચ હજાર રૂપિયા આપવામાં આવશે.

English summary

20 people were killed and over 30 injured when their bus collided head-on with a truck near Naugaon Navodaya Vidyalaya, about 20 killometres from Chhatarpur district of Mdhya pradesh.