મમતા બેનરજી સાથે ગેરવર્તણૂકઃ પાંચની ધરપકડ

Published: Monday, April 22, 2013, 16:41 [IST]

નવી દિલ્હી, 22 એપ્રિલઃ દિલ્હીમાં પશ્ચિમ બંગાળના મુખ્યમંત્રી મમતા બેનરજી અને રાજ્યના નાણામંત્રી અમિત મિત્રા સાથે કરવામાં આવેલી ગેરવર્તણૂકના સંબંધમાં સ્ટૂડન્ટ ફેડરેશન ઓફ ઇન્ડિયા(એસએફઆઇ)ના પાંચ કાર્યકર્તાઓની સોમવારે ધરપકડ કરવામાં આવી. આ જાણકારી દિલ્હી પોલીસના એક અધિકારીએ આપી છે.

એસએફઆઇ, માર્ક્સવાદી કોમ્યુનિસ્ટ પાર્ટી(માકપા)ની વિદ્યાર્થી શાખા છે. અધિકારીએ કહ્યું, આ મામલે બે મહિલાઓ સહિત એસએફઆઇના પાંચ કાર્યકર્તાઓની ધરપકડ કરવામાં આવી છે. તેમણે ત્યારબાદ સ્થાનિક ન્યાયાલયમાં રજૂ કરવામાં આવશે.

મમતા અને મિત્રા સાથે એસએફઆઇના કાર્યકર્તાઓએ એ સમયે ગેરવર્તણૂક કરી હતી, જ્યારે નવ એપ્રિલે તેઓ દિલ્હી સ્થિત યોજના આયોગના કાર્યાલયે પોતાના રાજ્યની યોજનાઓને અંતિમ રૂપ આપવા જઇ રહ્યાં હતા.

આ ઘટના બાદ મમતા કોલકતા પરત જતા રહ્યાં હતા અને તેમણે પ્રધાનમંત્રી મનમોહન સિંહ સાથેની પોતાની મુલાકાત રદ કરી હતી. તેમમે બાદમાં દિલ્હી અસુરક્ષિત હોવાની વાત કરી હતી. કોલકતા પરત ફર્યા બાદ સ્વાસ્થ્ય સંબંધી ફરિયાદ થતા તેમને હોસ્પિટલમાં સારવાર અર્થે દાખલ કરવામાં આવી હતી.

Published On April 22, 2013