કોંગ્રેસના અધ્યક્ષ પદ માટે રાહુલ ગાંધી ભર્યું નામાંકન
કોંગ્રેસના અધ્યક્ષ પદ માટે રાહુલ ગાંધી આજે સોનિયા અને મનમોહન સિંહની હાજરીમાં ભરશે નામાંકન. વધુ જાણો આ અંગે અહીં.
આખરે તે ઘડી આવી જ ગઇ જેની સોનિયા ગાંધી અને કોંગ્રેસને લાંબા સમયથી રાહ હતી. આજે કોંગ્રેસના અધ્યક્ષ પદ માટે રાહુલ ગાંધીએ નામાંકન ભર્યું હતું. આ માટે ભૂતપૂર્વ વડાપ્રધાન મનમોહન સિંહ રાહુલ ગાંધીના નિવાસ સ્થાને પહોંચ્યા હતા. અને રાહુલ, સોનિયા અને મનમોહનની સાથે ઘરેથી નામાંકન ભરવા માટે નીકળ્યા હતા. પાર્ટીના કેન્દ્રીય ચૂંટણી અધ્યક્ષ મુલ્લાપલ્લી રામચંદ્રના જણાવ્યા મુજબ અન્ય કોઇ પણ ઉમેદવારે હજી સુધી આ પક્ષ માટે અરજી નથી દાખલ કરી. અને ચૂંટણીમાં રાહુલ ગાંધી જ એક માત્ર ઉમેદવાર છે.
જે જોતા કોંગ્રેસ અધ્યક્ષ તરીકેના તમામ દ્વારા હાલ રાહુલ માટે ખુલ્લા છે તે વાત સ્પષ્ટ છે. નોંધનીય છે કે સોનિયા ગાંધીએ 20 વર્ષ સુધી આ પદ સંભાળ્યું છે. અને હવે આવનારા સમયમાં આ પદ રાહુલ ગાંધી સંભાળશે તેમ મનાઇ રહ્યું છે. તમને જણાવી દઇએ કે નામાંકન પછી અધ્યક્ષ પક્ષ માટે 19 ડિસેમ્બરે કાઉન્ટિંગ થશે અને આજ દિવસે નક્કી થશે કે કોણ કોંગ્રેસના નવા અધ્યક્ષ બનશે. જો કે સંપૂર્ણ પણે 100 ટકા શક્યતા તેવી જ રહેલી છે કે રાહુલ ગાંધી જ બહુ જલ્દી આ માટે દાવેદાર બનશે. નોંધનીય છે કે 18 ડિસેમ્બરે ગુજરાતમાં વિધાનસભાની ચૂંટણીના પરિણામો પણ આવશે અને તે પછી બીજા જ દિવસે રાહુલ ગાંધીની તાજપોશી થવાની સંભાવના છે. જો કે ગુજરાતના પરિણામો જે પણ આવે રાહુલનું અધ્યક્ષ બનવું તો પાક્કું જ છે.