Bihar Election: NDAમાં સીટ વહેંચણી ફાઈનલ, BJP-JDU એક ત્રાજવે તોલાયા, ચિરાગ પાસવાનને મળી આટલી બેઠકો

Bihar Election NDA Seat sharing: બિહાર વિધાનસભા ચૂંટણી 2025 માટે રાષ્ટ્રીય લોકતાંત્રિક ગઠબંધન (NDA)માં સીટ વહેંચણીનો મામલો આખરે ઉકેલાઈ ગયો છે. પટનાથી લઈને દિલ્હી સુધી ચાલેલી લાંબી ચર્ચાઓ અને બેઠકો બાદ તમામ સહભાગી પક્ષો વચ્ચે અંતિમ સમજૂતી સધાઈ છે.

ભાજપના બિહાર પ્રભારી વિનોદ તાવડેના દિલ્હી ખાતેના નિવાસસ્થાને યોજાયેલી મહત્ત્વની બેઠક બાદ સીટ વહેંચણીની સત્તાવાર જાહેરાત કરવામાં આવી છે.

સમાન બેઠકો પર લડશે BJP અને JDU

NDAમાં બે સૌથી મોટા પક્ષો ભારતીય જનતા પાર્ટી (BJP) અને જનતા દળ યુનાઇટેડ (JDU) વચ્ચે સમાન ધોરણે ચૂંટણી લડવાનો નિર્ણય લેવાયો છે. JDUની વધુ બેઠકો પર લડવાની માંગણી પૂરી થઈ શકી નથી.

BJP: 101 બેઠકો
JDU: 101 બેઠકો

આ ઉપરાંત, ગઠબંધનના અન્ય મહત્ત્વના સહયોગી પક્ષોને પણ બેઠકોની ફાળવણી કરવામાં આવી છે:

ચિરાગ પાસવાનની પાર્ટી (LJP-R): 29 બેઠકો
જીતનરામ માંઝીની પાર્ટી (HAM): અન્ય નાના પક્ષો સાથે મળીને બાકીની બેઠકો પર લડશે.

NDAમાં સંપૂર્ણ એકતાનો દાવો

બિહાર પ્રભારી વિનોદ તાવડેએ સીટ વહેંચણીની જાહેરાત કરતી વખતે સ્પષ્ટ કર્યું કે, "NDAના તમામ પક્ષો સંપૂર્ણપણે એકજૂટ છે અને પરસ્પર સહમતિથી સીટ વહેંચણી પર સમજૂતી થઈ છે." તેમણે વિશ્વાસ વ્યક્ત કર્યો કે તમામ પક્ષો એકસાથે મળીને મજબૂતીથી ચૂંટણી લડશે અને બિહારમાં ફરી NDAની સરકાર બનાવશે.

BJP અને JDU દ્વારા સમાન બેઠકો પર લડવાના નિર્ણયથી રાજકીય સમીકરણોમાં સંતુલન જાળવવાનો પ્રયાસ કરવામાં આવ્યો છે, જ્યારે યુવા નેતા ચિરાગ પાસવાનને પણ મહત્ત્વનું સ્થાન આપવામાં આવ્યું છે.

English summary

Bihar Election 2025: NDA Seat Sharing Finalized, BJP and JDU Get Equal Seats, Chirag Paswan Gets 29