Weather News: 11 રાજ્યોમાં ભારે વરસાદનું એલર્ટ, ઘણી જગ્યાએ વીજળીના કડાકા ભડાકા થશે, શું છે દિલ્હીની સ્થિતિ?

Weather News: ભારતીય હવામાન વિભાગ (IMD) એ પશ્ચિમી વિક્ષોભ (વેસ્ટર્ન ડિસ્ટર્બન્સ) સક્રિય થવાને કારણે 11 રાજ્યોમાં ભારે વરસાદનું એલર્ટ જારી કર્યું છે, જેમાં દેશની રાજધાની દિલ્હીનો પણ સમાવેશ થાય છે.

આ રાજ્યોમાં દિલ્હી, ઉત્તર પ્રદેશ, હરિયાણા, પંજાબ, ઉત્તરાખંડ, જમ્મુ-કાશ્મીર, લદ્દાખ, મધ્ય પ્રદેશ, રાજસ્થાન અને બિહારનો સમાવેશ થાય છે. IMD અનુસાર, આ દરમિયાન કેટલાક વિસ્તારોમાં કરા પડવાની, વીજળી કડાકા થવાની અને 50 કિમી પ્રતિ કલાકની ઝડપે તોફાની પવન ફૂંકાવાની પણ શક્યતા છે.

દિલ્હીમાં ફેબ્રુઆરીમાં જ તાપમાનનો પારો વધવા લાગ્યો છે. IMDએ અહીં હળવાથી મધ્યમ વરસાદની આગાહી કરી છે, જ્યાં 30થી 50 કિમી પ્રતિ કલાકની ઝડપે પવન ફૂંકાઈ શકે છે. શહેરનું મહત્તમ તાપમાન 27°C અને લઘુત્તમ તાપમાન 15°C રહેવાનું અનુમાન છે.

સવારે 5 વાગ્યાની સ્થિતિએ દિલ્હીના મુખ્ય સ્ટેશનો પર વાયુ ગુણવત્તા સૂચકાંક (AQI) નીચે મુજબ નોંધાયો હતો: પૂસા 282, શાહદીપુર 255, પંજાબી બાગ (શિવાજી પાર્ક) 269, નોર્થ કેમ્પસ (દિલ્હી મિલ્ક સ્કીમ કોલોની) 279 અને મુંડકા 288.

મધ્ય પ્રદેશમાં ભોપાલ, ઇન્દોર, ગ્વાલિયર, દતિયા, નિવાડી, છતરપુર, ચંબલ, જબલપુર, નર્મદાપુરમ, રીવા, સાગર, શાહડોલ અને ઉજ્જૈન સહિતના વિસ્તારો માટે ભારે વરસાદ અને કરા માટે યલો એલર્ટ જારી કરાયું છે. લોકોને સાવધાન રહેવા અપીલ કરાઈ છે.

રાજસ્થાનમાં પણ ભારે વરસાદ અને તેજ પવનની શક્યતા છે. ઉદયપુર, જોધપુર, જયપુર, અજમેર, કોટા, બીકાનેર, બાડમેર, જેસલમેર, ભીલવાડા અને અલવર સહિતના શહેરો પ્રભાવિત થઈ શકે છે. બહાર નીકળતા પહેલા હવામાન અપડેટ તપાસવા IMD એ સલાહ આપી છે.

ઉત્તર પ્રદેશમાં લખનઉ, ગોંડા, રાયબરેલી, પ્રયાગરાજ, આગ્રા, અમેઠી, અમરોહા, અયોધ્યા, બાગપત, બલિયા, બાંદા, બારાબંકી, બીજનૌર અને હાપુડ જેવા શહેરોમાં હળવો વરસાદ સંભવ છે. બનારસ અને જૌનપુરમાં મધ્યમ વરસાદ જોવા મળી શકે છે. પૂર્વીય અને મધ્ય ઉત્તર પ્રદેશમાં વરસાદ પછી તાપમાન 30°C ને પાર કરી શકે છે.

ઉત્તરાખંડ, હિમાચલ પ્રદેશ અને જમ્મુ-કાશ્મીરમાં આજે પણ હિમવર્ષા અને વરસાદ ચાલુ રહેશે, જે તાપમાનમાં ઘટાડો લાવશે. જોકે, 20 ફેબ્રુઆરી પછી આ વિસ્તારોના હવામાનમાં સુધારો જોવા મળશે. આ ઉપરાંત, ચેન્નાઈ સહિત સમગ્ર તમિલનાડુમાં પણ હળવાથી મધ્યમ વરસાદની આગાહી સાથે એલર્ટ અપાયું છે.

English summary

The Indian Meteorological Department (IMD) has issued a heavy rainfall alert across eleven states due to a western disturbance, with Delhi among affected areas. Expect gusty winds, possible thunder showers, and cooler conditions in several regions, including the northern and central parts of the country.