'70 કલાક કામ કરવામાં વાંધો શું છે? યુવાનો કરે જોરદાર મહેનત' નારાયણ મૂર્તિએ ફરી વાર આપી સલાહ

ઇન્ફોસિસના સહ-સ્થાપક નારાયણ મૂર્તિએ યુવા ભારતીયોમાં મજબૂત કાર્ય નીતિની જરૂરિયાત પર ભાર મૂક્યો હતો. તેમણે વૃદ્ધિ અને રોજગાર સર્જનને ચલાવવા માટે ઉદ્યોગસાહસિકતાના મહત્વ પર પ્રકાશ પાડ્યો અને 70 કલાક કામ કરવાના તેમના નિવેદનને ફરી એકવાર યોગ્ય ઠેરવ્યું.

આપણે હજુ ઘણુ કરવાનું છે

કોલકાતાની મુલાકાત દરમિયાન બોલતા તેમણે કોલકાતાને સૌથી વધુ સંસ્કારી શહેર ગણાવ્યું, NDTVના અહેવાલમુજબ, તેમના સંબોધનમાં તેમણે કહ્યું હતું કે "ઇન્ફોસીસમાં મેં કહ્યું હતું કે આપણે આપણી જાતને શ્રેષ્ઠ વૈશ્વિક કંપનીઓ સાથે સરખાવીશું. એકવાર આપણે આપણી જાતને શ્રેષ્ઠ કંપનીઓ સાથે સરખાવીશું, હું તમને કહી શકું છું કે આપણે ભારતીયોએ ઘણું કરવાનું છે."

આપણે જ મહેનત કરવી પડશે

અમારી આકાંક્ષાઓ ઊંચી છે કારણ કે 800 મિલિયન ભારતીયોને મફત રાશન મળે છે, જેનો અર્થ છે કે તેઓ ગરીબીમાં છે, જો આપણે સખત મહેનત કરવા તૈયાર નથી, તો કોણ કરશે?

નંબર-1 બનાવવા કામ કરવુ પડશે
નારાયણ મૂર્તિએ 70 કલાકના કામકાજના સપ્તાહ અંગેના તેમના નિવેદનને યોગ્ય ઠેરવ્યું છે. મૂર્તિએ કહ્યું કે યુવાનોએ સમજવાની જરૂર છે કે "આપણે સખત મહેનત કરવી પડશે અને ભારતને નંબર વન બનાવવા માટે કામ કરવું પડશે."