પંજાબ પોલીસ એક્શન મોડમાં, 7 દિવસમાં 234 ડ્ર્ગ માફિયાઓની ધરપકડ, 25 ભાગેડુઓ પણ ઝડપાયા

પંજાબમાં એક સપ્તાહમાં એનડીપીએસ એક્ટ હેઠળ 189 એફઆઈઆર નોંધવામાં આવી છે. જેમાં કુલ 234 ડ્રગ માફિયાની ધરપકડ કરવામાં આવી છે.

Updated: Wednesday, March 15, 2023, 13:03 [IST]

પંજાબ પોલીસના આઈજીપી હેડક્વાર્ટર સુખચૈન સિંહ ગિલે ગુનાહિત ઘટનાઓને રોકવામાં પોલીસની સિદ્ધિઓ ગણાવી હતી. રાજ્યમાં એક સપ્તાહમાં એનડીપીએસ એક્ટ હેઠળ 189 એફઆઈઆર નોંધવામાં આવી છે. જેમાં કુલ 234 ડ્રગ માફિયાની ધરપકડ કરવામાં આવી છે. તેમણે જણાવ્યુ કે આમાં કૉમર્શિયલ જથ્થાની 22 એફઆઈઆર નોંધવામાં આવી છે. આ સાથે ડ્રગ્સના 27 મોટા દાણચોરોની પણ ધરપકડ કરવામાં આવી છે.

આઈજીપી સુખચૈન સિંહ ગિલે જણાવ્યુ હતુ કે જલંધર (ગ્રામીણ)માં સૌથી વધુ 16, પટિયાલામાં 13 અને ફિરોઝપુરમાં 13 કેસ નોંધાયા છે. ગુરદાસપુર, પટિયાલા અને સંગરુરમાં વેપારી જથ્થાના ત્રણ-ત્રણ કેસ નોંધાયા હતા. તેમણે કહ્યુ કે પોલીસે એક સપ્તાહમાં 7 કિલો હેરોઈન, 10 કિલો અફીણ, ઈન્જેક્શન અને ગોળીઓ સહિત 59,271 મેડિકલ યુનિટ જપ્ત કર્યા છે. આ સાથે વિવિધ કેસમાં ફરાર 25 આરોપીઓની પણ ધરપકડ કરવામાં આવી હતી.

આઈજીપી સુખચૈન સિંહ ગિલે જણાવ્યુ કે છેલ્લા 8 મહિનાથી પંજાબ પોલીસ દ્વારા ત્રણ મોરચે અભિયાન ચલાવવામાં આવી રહ્યુ છે. આમાં ડ્રગ્સ, ગેંગસ્ટર અને આતંકવાદીઓ વિરુદ્ધ કાર્યવાહી ચાલી રહી છે. આ દિશામાં પંજાબ પોલીસ દ્વારા આર્મ્સ એક્ટના કેસમાં નામી આરોપીઓની તપાસ કરવામાં આવી હતી. આ અંતર્ગત 400 પોલીસ ટીમો બનાવીને વિવિધ જિલ્લાના કુલ 1340 આરોપીઓની તપાસ કરવામાં આવી હતી. તેનો હેતુ તેમના પર સતત નજર રાખવાનો હતો.

આ સિવાય જી-20ને ધ્યાનમાં રાખીને ઓપરેશન સી-2 વિશે જણાવ્યુ. જેમાં સુરક્ષા વ્યવસ્થા, એન્ટ્રી અને એક્ઝિટ પોઈન્ટને મજબૂત કરવા સાથે 10 આંતર-રાજ્ય સરહદી વિસ્તારોમાં 112 નાકા બનાવવામાં આવ્યા હતા. આ દરમિયાન 5669 વાહનોનું ચેકિંગ કરતાં 300થી વધુ વાહનોના ચલણ કરવામાં આવ્યા હતા. તેમજ 39થી વધુ વાહનો જપ્ત કરવામાં આવ્યા હતા. એનડીપીએસ એક્ટ હેઠળ 21 કેસ નોંધાયા હતા. જેમાં 3.5 કિલોથી વધુ અફીણ, હેરોઈન અને ભૂકી મળી આવી હતી.