10 લોકોને મળવા માંગે છે રામ રહીમ, હનીપ્રીતનું નામ 1લા નંબરે

આ 10 લોકોને મળવા માંગે છે રામ રહીમ, હનીપ્રીતનું નામ સૌથી ઉપર. રામ રહીમને રોહતકની જેલમાં કેદ કરાયા બાદ હનીપ્રીત ગાયબ છે. બીજી બાજુ, બાબાને ડેરામાંથી પોલીસને મોટી માત્રામાં હથિયારો મળી આવ્યા છે.

By Shachi

Updated: Monday, September 4, 2017, 18:43 [IST]

ડેરા સચ્ચા સૌદાના પ્રમુખ ગુરમીત રામ રહીમ સિંહ બે સાધ્વી સાથે બળાત્કારના કેસમાં રોહતક જેલમાં સજા કાપી રહ્યાં છે. 25 ઓગસ્ટના રોજ તેમને રોહતક જેલમાં બંધ કરવામાં આવ્યા હતા. જેલમાં એકલાપણાથી કંટાળેલા રામ રહીમે જેલરને 10 લોકોની એક સૂચિ આપી છે, જેમને તેઓ મળવા માંગે છે. કેહવાય છે કે, જેલમાં કેદ રામ રહીમ દિવસ-રાત દીવાલો સાથે વાત કરે છે અને માથા પછાડે છે. તેની આજુ-બાજુની બેરેકમાં કેદ 13 કેદીઓ રામ રહીમથી કંટાળીને હડતાળ પર બેઠા છે.

મુલાકાતીઓની સૂચિ

રામ રહીમે જેલ પ્રસાશનને જે 10 લોકોના નામની સૂચિ આપી છે, એમાં હનીપ્રીતનું નામ સૌથી ઉપર છે. રામ રહીમની દત્તક પુત્રી હાલ ગાયબ છે, તેણે હનીપ્રીતનો મોબાઇલ નંબર પણ આપ્યો છે. આ સિવાય તેણે પોતાના પુત્ર અને તેની પત્ની, પોતાની બંને પુત્રીઓ અને તેમના પતિના નામ સૂચિમાં લખ્યા છે. સાથે જ ડેરાનું કામકાજ સંભાળતા કેટલાક લોકોના નામ પણ આ સૂચિમાં છે.

પોલીસ પણ હનીપ્રીતની શોધમાં

બળાત્કારના મામલે ગુરમીત રામ રહીમ જ્યારે પંચકુલા પહોંચ્યા ત્યારે હનીપ્રીત પણ તેમની સાથે હતી અને અદાલતથી હેલિકોપ્ટર દ્વારા રામ રહીમને રોહતક જેલ મોકલવામાં આવ્યા ત્યારે પણ તે હેલિકોપ્ટરમાં બાબા સાથે જ બેઠેલી જોવા મળી હતી. પરંતુ ત્યાર બાદ હનીપ્રીતનો કોઇ પત્તો નથી. દેશદ્રોહ સહિત અનેક મામલે આરોપી હનીપ્રીતને પોલીસ પણ શોધી રહી છે. અદાલત દ્વારા હનીપ્રીત વિરુદ્ધ લુક આઉટ નોટિસ પણ જાહેર કરવામાં આવી છે.

હનીપ્રીત અને રામ રહીમ

ગુરમીત રામ રહીમ સિંહ હનીપ્રીતને પોતાની માનેલી પુત્રી ગણાવે છે અને તેણે હનીપ્રીતને દત્તક પણ લીધી છે, પરંતુ આ બંનેના સંબંધો અંગે અનેક પ્રકારની વાતો સામે આવી છે. હનીપ્રીતના પતિએ તેની પર અનેક ગંભીર આરોપ મુક્યા હતા. હનીપ્રીતના પતિ અનુસાર, તેણે ગુરમીત અને હનીપ્રીતને આપત્તિજનક પરિસ્થિતિમાં જોયા હતા અને તેઓ પિતા-પુત્રી હોવાનું માત્ર નાટક કરી રહ્યાં છે.

બાબાના ડેરામાંથી મળ્યા હથિયાર

રામ રહીમનો ડેરા સચ્ચા સૌદાનો કારભાર અનેક એકર જમીનમાં ફેલાયેલો છે. ડેરામાં આવેલી રામ રહીમની ગુફા કોઇ આલિશાન મહેલની તોલે આવે એવી છે. હરિયાણા પોલીસ દ્વારા જ્યારે સિરસા સ્થિત ડેરા સચ્ચા સૌદાના મુખ્યાલયમાં છાપો મારવામાં આવ્યો ત્યારે પોલીસને ત્યાંથી મોટી સંખ્યામાં હથિયાર મળી આવ્યા હતા. પોલીસને અલગ-અલગ જાતની બંદૂકો અને બીજા પણ કેટલાક હથિયાર મળ્યા હતા.