રાફેલ ડીલ માટે 65 કરોડની લાંચ અપાઈ હોવાનો ફ્રેન્ચ મીડિયાનો દાવો, CBI પણ જાણતી હતી!
રાફેલ ડીલમાં વિપક્ષી પાર્ટીઓ સતત ભ્રષ્ટાચારના આરોપો લગાવી રહી છે. હવે આ મામલે એક નવો ખુલાસો થયો છે.
નવી દિલ્હી, 8 નવેમ્બર : રાફેલ ડીલમાં વિપક્ષી પાર્ટીઓ સતત ભ્રષ્ટાચારના આરોપો લગાવી રહી છે. હવે આ મામલે એક નવો ખુલાસો થયો છે. ફ્રેન્ચ પોર્ટલ મીડિયાપાર્ટે દાવો કર્યો છે કે સોદો પૂરો કરવા માટે વચેટિયા સુશેન ગુપ્તાને 7.5 મિલિયન યુરો (લગભગ 65 કરોડ રૂપિયા)ની લાંચ આપવામાં આવી હતી. આ લાંચ ફ્રેન્ચ એરક્રાફ્ટ ઉત્પાદક ડેસોલ્ટ એવિએશન દ્વારા આપવામાં આવી હતી, જેના પુરાવા પણ તેમની પાસે છે.
ફ્રેન્ચ મેગેઝિન મીડિયાપાર્ટે આરોપ લગાવ્યો છે કે, ભારતને રાફેલ જેટનું વેચાણ સુરક્ષિત કરવા માટે ડસોલ્ટે મિડલમેન સુશેન ગુપ્તાને 2007 અને 2012 વચ્ચે શેલ કંપની સાથે "ઓવરબિલ" આઈટી કોન્ટ્રાક્ટ દ્વારા ઓછામાં ઓછા 7.5 મિલિયન યુરો ચૂકવ્યા હતા. CBI અને EDએ ઓક્ટોબર 2018 સંબંધિત દસ્તાવેજો હોવા છતાં કોઈ પગલાં લીધાં નથી. રિપોર્ટમાં દાવો કરવામાં આવ્યો છે કે દસ્તાવેજો હોવા છતાં ભારતીય એજન્સીઓએ આ મામલાને આગળ ન વધારવાનો નિર્ણય કર્યો.
તપાસ એજન્સીઓએ ગુપ્તા પર મોરેશિયસ સ્થિત શેલ કંપની ઈન્ટરસ્ટેલર ટેક્નોલોજીસ લિમિટેડ અને અન્ય કેટલીક સંસ્થાઓ દ્વારા 2010ના અગસ્તા વેસ્ટલેન્ડ વીવીઆઈપી ચોપર સોદામાં મુખ્ય ભૂમિકા ભજવવાનો આરોપ મૂક્યો છે. સુશેન ગુપ્તાની અગાઉ અગસ્તા વેસ્ટલેન્ડ ડીલમાં કથિત રીતે લાંચ લેવાના આરોપમાં ધરપકડ કરવામાં આવી હતી. મીડિયાપાર્ટે એપ્રિલમાં એક અહેવાલ પ્રકાશિત કર્યો હતો, જેમાં જણાવાયું હતું કે કેવી રીતે એક પ્રભાવશાળી ભારતીય ઉદ્યોગપતિને રાફેલ નિર્માતા ડેસોલ્ટ એવિએશન અને ફ્રેન્ચ ડિફેન્સ ઇલેક્ટ્રોનિક્સ કંપની થેલ્સ દ્વારા ગુપ્ત રીતે લાખો યુરો ચૂકવવામાં આવ્યા હતા.
ફ્રેન્ચ પોર્ટલના અહેવાલ મુજબ, મોરેશિયસમાં એટર્ની જનરલના કાર્યાલયે હેલિકોપ્ટર ડીલ કેસમાં માહિતી માગતા વિનંતી પત્રના જવાબમાં 11 ઓક્ટોબર, 2018ના રોજ સીબીઆઈ ડિરેક્ટરને દસ્તાવેજો મોકલ્યા હતા. એક સપ્તાહ પહેલા 4 ઓક્ટોબર 2018ના રોજ સીબીઆઈને એડવોકેટ પ્રશાંત ભૂષણ અને પૂર્વ કેન્દ્રીય મંત્રી અરુણ શૌરી તરફથી રાફેલ સોદામાં ભ્રષ્ટાચારનો આરોપ લગાવતી ફરિયાદ મળી હતી.
મીડિયાપાર્ટનો અહેવાલ છે કે, સુશેન ગુપ્તાની મોરેશિયસ સ્થિત કંપની ઇન્ટરસ્ટેલર ટેક્નોલોજીસને 2007 અને 2012 વચ્ચે ફ્રેન્ચ એવિએશન ફર્મ પાસેથી ઓછામાં ઓછા 7.5 મિલિયન યુરો મળ્યા હતા. તેની પાસે ભારતને 36 રાફેલ ફાઇટર જેટના વેચાણની ખાતરી કરવા માટે ફ્રેન્ચ એરક્રાફ્ટ નિર્માતા ડેસોલ્ટ એવિએશન દ્વારા ચૂકવવામાં આવેલી લાંચના પુરાવા છે. અહેવાલમાં જણાવાયું છે કે, મોટા ભાગના નાણા કથિત ખોટા ઇન્વોઇસની સિસ્ટમનો ઉપયોગ કરીને મોરેશિયસ મોકલવામાં આવ્યા હતા. આમાંના કેટલાક ઇનવોઇસમાં ફ્રેન્ચ કંપનીનું નામ પણ ખોટું હતું.