CSમાં સુરતની નિકિતાએ મેદાન માર્યુ, સમગ્ર દેશમાં ટોપ પર રહી!
ઈન્સ્ટિટ્યૂટ ઑફ કંપની સેક્રેટરીઝ ઑફ ઈન્ડિયા એ જૂન 2022માં લેવાયેલી CS એક્ઝિક્યુટિવ અને પ્રોફેશનલ લેવલની પરીક્ષાનું પરિણામ જાહેર કર્યું છે. જેમાં સુરતની નિકિતા ચંદવાણીએ દેશમાં પ્રથમ સ્થાન મેળવ્યું છે.
સુરત : ઈન્સ્ટિટ્યૂટ ઑફ કંપની સેક્રેટરીઝ ઑફ ઈન્ડિયા એ જૂન 2022માં લેવાયેલી CS એક્ઝિક્યુટિવ અને પ્રોફેશનલ લેવલની પરીક્ષાનું પરિણામ જાહેર કર્યું છે. જેમાં સુરતની નિકિતા ચંદવાણીએ દેશમાં પ્રથમ સ્થાન મેળવ્યું છે. દિવસમાં સાતથી આઠ કલાક તૈયારી કરતી નિકિતાને બીકોમ કર્યા બાદ નજીકના ભવિષ્યમાં સારી કંપનીમાં નોકરી મળવાની આશા છે. નિકિતાએ કહ્યું કે આ પરિણામ પહેલા દિવસથી જ તૈયારી કરી મેળવ્યું છે.
12માં કોમર્સમાં 92 ટકા મેળવીને સીએસ પ્રોફેશનલમાં એડમિશન લેનારી નિકિતાએ 900માંથી 576 માર્ક્સ મેળવીને દેશમાં પ્રથમ સ્થાન મેળવ્યું છે. સ્નેહ ભાટિયા અને ઇગ્નાઇટ સેન્ટરના સીએસ ભૂપેન્દ્ર જૈનના માર્ગદર્શન હેઠળ પરીક્ષાની તૈયારી કરનાર નિકિતા દિવસમાં સાતથી આઠ કલાક તૈયારી કરતી હતી. જેના કારણે આ સફળતા મળી છે. તે દરરોજ ખંતપૂર્વક તૈયારી કરતી અને નોંધો બનાવતી. નિકિતાએ વધુમાં ઉમેર્યું હતું કે પરીક્ષા પહેલા યોગ્ય ઊંઘ લેવી પણ જરૂરી છે.
નિકિતાએ જણાવ્યું કે, પિતા રમેશભાઈ ચંદવાણી કાપડ માર્કેટમાં સર્વિસ એજન્સી ચલાવે છે અને માતા રેખાબેન ગૃહિણી છે અને ભાઈ વિવેક 12માં કોમર્સમાં અભ્યાસ કરે છે. પરિવારના સતત સહકારથી આજે આ પરિણામ પ્રાપ્ત થયું છે. દેશમાં પ્રથમ સ્થાન મેળવતા પરિવારમાં ખુશીનો માહોલ છે.
નિકિતાએ કહ્યું, મને RCD એટલે કે કોર્પોરેટ વિષયનું રિઝોલ્યુશન મુશ્કેલ લાગ્યું. જો કે, આ વિષય પહેલા સતત પ્રેક્ટિસ જરૂરી અને આમ તૈયાર કરીને અને નોંધો બનાવવાથી મુશ્કેલ વિષયો પણ સરળતાથી ઉકેલી શકાય છે.
નિકિતાએ કહ્યું કે જ્યારે હું પરીક્ષાની તૈયારી કરતી હતી ત્યારે મને કંટાળો આવતો હતો, પછી સોશિયલ મીડિયાનો ઉપયોગ કરતી હતી અને તે જ રીતે ફ્રેશ થઈ જતી હતી. કોઈએ બોજ કે ખોટા વિચારથી પરીક્ષાની તૈયારી ન કરવી જોઈએ.