Tsunami Warning: ઇન્ડોનેશિયામાં 7.4ની તીવ્રતાનો શક્તિશાળી ભૂકંપ, સુનામીનું એલર્ટ
Indonesia Earthquake: ઇન્ડોનેશિયાના મોલુક્કા સમુદ્રમાં આવેલા શક્તિશાળી ભૂકંપે ફરી એકવાર દક્ષિણ-પૂર્વ એશિયાના દેશોમાં ફફડાટ ફેલાવી દીધો છે. રિક્ટર સ્કેલ પર 7.4ની તીવ્રતા ધરાવતા આ ભૂકંપના આંચકાઓએ માત્ર ઈમારતોને જ નથી હલાવી દીધી, પરંતુ ઊંડા સમુદ્રમાં સુનામીના જોખમને પણ સક્રિય કરી દીધું છે. પ્રશાંત મહાસાગરના 'રિંગ ઓફ ફાયર' પર સ્થિત હોવાને કારણે આ દ્વીપસમૂહ પર કુદરતનો કહેર ફરી એકવાર મોટી તબાહીનો સંકેત આપી રહ્યો છે.
યુએસ જીઓલોજિકલ સર્વે (USGS) મુજબ, આ ભૂકંપ ગુરુવારે સવારે લગભગ પોણા સાત વાગ્યે ઇન્ડોનેશિયાના ઐતિહાસિક મસાલા દ્વીપ, ટેરનેટ (Ternate) થી આશરે 127 કિલોમીટર દૂર ઉત્તર-પશ્ચિમમાં નોંધાયો હતો. ભૂકંપનું કેન્દ્ર જમીનથી 35 કિલોમીટરની ઊંડાઈએ હતું.
શરૂઆતના અંદાજમાં તેની તીવ્રતા 7.8 માપવામાં આવી હતી, જેને પાછળથી સુધારીને 7.4 કરવામાં આવી હતી. ભૂકંપ એટલો જોરદાર હતો કે ત્યારબાદ 5ની તીવ્રતાના અનેક આફ્ટરશોક્સ પણ અનુભવાયા હતા.
આ દેશો પર સુનામીનું સંકટ
ભૂકંપ બાદ તરત જ અમેરિકન સુનામી ચેતવણી પ્રણાલી એલર્ટ થઈ ગઈ હતી. કેન્દ્રથી 1,000 કિલોમીટરના વિસ્તારમાં આવતા ઇન્ડોનેશિયા, ફિલિપાઈન્સ અને મલેશિયાના દરિયાકાંઠે વિનાશક મોજા ઉછળવાની આશંકા વ્યક્ત કરવામાં આવી છે. ખાસ કરીને ઇન્ડોનેશિયાના ઉત્તરી માલુકુ અને ઉત્તરી સુલાવેસી પ્રાંતો માટે રેડ એલર્ટ જારી કરવામાં આવ્યું છે. ટેરનેટ અને ટિડોરેની પ્રાદેશિક સરકારોને સૂચના આપવામાં આવી છે કે તેઓ દરિયાકાંઠાના વિસ્તારોમાં રહેતા નાગરિકોને સુરક્ષિત અને ઊંચા સ્થળોએ ખસેડવા (Evacuation) માટે તૈયાર રહે.
ખતરનાક 'રિંગ ઓફ ફાયર'ની ઝપેટમાં ઇન્ડોનેશિયા
આશરે 28 કરોડની વસ્તી ધરાવતો આ વિશાળ દ્વીપસમૂહ વિશ્વના સૌથી સક્રિય ભૂકંપીય ક્ષેત્ર 'પ્રશાંત રિંગ ઓફ ફાયર' પર સ્થિત છે. અહીં ફોલ્ટ લાઇનો અને જ્વાળામુખીઓનું એવું જાળું છે જે તેને વિશ્વનો સૌથી અસુરક્ષિત વિસ્તાર બનાવે છે. ઇતિહાસ સાક્ષી છે કે 2004ની સુનામીમાં અહીં 2.3 લાખ લોકોએ જીવ ગુમાવ્યા હતા, જ્યારે 2018 અને 2022ના ભૂકંપમાં પણ હજારો લોકોના મોત થયા હતા. વર્તમાન પરિસ્થિતિને જોતા નિષ્ણાતો આગામી કેટલાક કલાકોને અત્યંત સંવેદનશીલ માની રહ્યા છે.
Click it and Unblock the Notifications
Sign in with Google
