વર્લ્ડ કપ જીતવા સાથે સાથે રિચા ઘોષે ઇતિહાસ રચ્યો
ICC મહિલા વર્લ્ડ કપ ૨૦૨૫ ની ફાઇનલમાં ભારતીય મહિલા ક્રિકેટ ટીમે દક્ષિણ આફ્રિકા સામે શાનદાર વિજય મેળવ્યો છે. આ જીતમાં વિકેટકીપર-બેટ્સમેન રિચા ઘોષનું યોગદાન ખૂબ જ મહત્વનું રહ્યું હતું.
રિચાએ પોતાની ટૂંકી પણ વિસ્ફોટક ઇનિંગથી ટીમને ૨૯૮ રનના મજબૂત સ્કોર સુધી પહોંચાડી હતી. આ સાથે જ તેણે એક વર્લ્ડ કપમાં સૌથી વધુ છગ્ગા મારવાનો વિશ્વ રેકોર્ડની પણ બરાબરી કરી છે.
ફાઇનલ મેચમાં રિચા ઘોષે માત્ર ૨૪ બોલમાં ૩૪ રન બનાવ્યા હતા, જેમાં તેણે બે છગ્ગા ફટકાર્યા હતા. આ બે છગ્ગા સાથે તેણે આખા ટુર્નામેન્ટમાં કુલ ૧૨ છગ્ગા લગાવ્યા. આમ તેણે એક જ વર્લ્ડ કપ સિઝનમાં સૌથી વધુ ૧૨ છગ્ગા મારવાના વિશ્વ રેકોર્ડની બરાબરી કરી લીધી છે.
અગાઉ આ રેકોર્ડ વેસ્ટ ઇન્ડિઝની ડિયાન્ડ્રા ડોટિન (૨૦૧૩) અને દક્ષિણ આફ્રિકાની લિઝેલ લી (૨૦૧૭) ના નામે નોંધાયેલો હતો. રિચાએ છગ્ગા મારવાના મામલે ભારતીય કેપ્ટન હરમનપ્રીત કૌરને પણ પાછળ છોડી દીધી, જેમણે ૨૦૧૭ ના વર્લ્ડ કપમાં ૧૧ છગ્ગા માર્યા હતા, જે કોઈ પણ ભારતીય ખેલાડી દ્વારા એક સીઝનમાં સૌથી વધુ હતા.
વરસાદથી પ્રભાવિત આ મેચમાં દક્ષિણ આફ્રિકાએ ટોસ જીતીને પ્રથમ ફિલ્ડિંગ કરવાનો નિર્ણય કર્યો હતો. ભારતને સ્મૃતિ મંધાના (૪૫ રન) અને શેફાલી વર્માએ શાનદાર શરૂઆત અપાવી હતી.
શેફાલી વર્માએ પણ ઇતિહાસ રચ્યો, તેણે ૭૮ બોલમાં ૭ ચોગ્ગા અને ૨ છગ્ગાની મદદથી ૮૭ રનની શાનદાર ઇનિંગ રમી. આ તેના કરિયરનો સર્વશ્રેષ્ઠ વન-ડે સ્કોર હતો.
શેફાલીએ આ દરમિયાન સૌથી ઓછી ઉંમરે (યુવા) વર્લ્ડ કપ ફાઇનલમાં ૫૦+ સ્કોર બનાવનારી ભારતીય ખેલાડી બનીને ઇતિહાસ રચ્યો. ઓપનિંગ જોડી આઉટ થયા પછી, દીપ્તિ શર્માએ પણ અણનમ અર્ધશતક ફટકાર્યું અને રિચા ઘોષના મહત્વપૂર્ણ યોગદાનથી ભારતને વર્લ્ડ કપ ફાઇનલના ઇતિહાસમાં બીજો સૌથી મોટો સ્કોર બનાવવામાં મદદ મળી.
Click it and Unblock the Notifications
Sign in with Google
