Ishan Kishan: IPLની પ્રથમ મેચમાં ઈતિહાસ રચશે ઈશાન કિશન, 2 રન બનાવીને કોહલી-રોહિતના ક્લબમાં થશે સામેલ

Ishan Kishan: ભારતીય વિકેટકીપર-બેટ્સમેન ઈશાન કિશન આઈપીએલની આગામી સિઝનમાં એક મોટા રેકોર્ડની ખૂબ જ નજીક છે. પોતાની આક્રમક બેટિંગ માટે જાણીતા કિશન પોતાની આઈપીએલ કારકિર્દીના 3000 રન પૂરા કરવાથી માત્ર 2 રન દૂર છે. જેવી જ તે પોતાની પ્રથમ મેચમાં આ આંકડો પાર કરશે, તે આઈપીએલના ઈતિહાસમાં 3000 રન બનાવનાર 29મો ખેલાડી બની જશે.

તેની પહેલા 28 ખેલાડીઓ આ સિદ્ધિ મેળવી ચૂક્યા છે. આ યાદીમાં વિરાટ કોહલીનું નામ સૌથી ઉપર છે, જેમણે IPLમાં 8600થી વધુ રન બનાવ્યા છે. રોહિત શર્માએ પણ 7000થી વધુ રન ફટકાર્યા છે.

ઈશાન કિશનની IPL કારકિર્દી (Ishan Kishan Stats)

તેની અત્યાર સુધીની આઈપીએલ કારકિર્દી પર નજર કરીએ તો, કિશને 119 મેચમાં 2998 રન બનાવ્યા છે. આ દરમિયાન તેની એવરેજ 29.11 અને સ્ટ્રાઈક રેટ 137.65 રહ્યો છે, જે તેની વિસ્ફોટક બેટિંગ શૈલી દર્શાવે છે. તેણે પોતાના નામે 1 સદી અને 17 અડધી સદી પણ નોંધાવી છે, જ્યારે 288 ચોગ્ગા અને 134 છગ્ગા ફટકારીને બોલરો પર સતત દબાણ જાળવી રાખ્યું છે.

3000 રનનો આંકડો પાર કરવો એ કોઈપણ બેટ્સમેન માટે મોટી ઉપલબ્ધિ માનવામાં આવે છે, અને કિશનનું આ લિસ્ટમાં સામેલ થવું તેના સતત સારા પ્રદર્શનનું પ્રમાણ હશે. ખાસ વાત એ છે કે તેણે આ સિદ્ધિ સરખામણીએ ઓછી મેચોમાં હાંસલ કરી છે.

ખેલાડીની સાથે કેપ્ટનશીપની જવાબદારી

બીજી એક ખાસ વાત એ છે કે ઈશાન કિશન આ વખતે આઈપીએલમાં બેવડી ભૂમિકામાં જોવા મળશે. સનરાઈઝર્સ હૈદરાબાદે (SRH) તેને કેપ્ટન બનાવ્યો છે. તે શરૂઆતના તબક્કા દરમિયાન ટીમની કમાન સંભાળવાનો છે. ત્યારબાદ જ્યારે પેટ કમિન્સ પરત ફરશે, ત્યારે તેને રાહત મળશે.

સદી ફટકારે તો નવાઈ નહીં

ટી20 વર્લ્ડ કપમાં ઈશાન કિશનનું બેટ જોરદાર ચાલ્યું હતું, તેવી જ રીતે આ વખતે પણ તેની પાસેથી પ્રદર્શનની અપેક્ષા રાખવામાં આવી રહી છે. ભારતની વર્લ્ડ કપ જીતમાં કિશનનું મહત્વનું યોગદાન રહ્યું છે. જો તે આ આઈપીએલમાં સદી ફટકારે તો નવાઈ પામવા જેવું નહીં હોય.

English summary

Ishan Kishan is on the verge of making history in his first match of IPL 2026. Needing just 2 runs to hit the 3000-run mark, see how the new SRH captain compares to legends like Kohli and Rohit.