સ્પોટ ફિક્સિંગમાં વધારે ચાર ક્રિકેટર્સની સામેલગીરી બહાર આવી

Updated: Wednesday, May 22, 2013, 9:51 [IST]

નવી દિલ્હી, 22 મે : આઇપીએલ 6માં સ્પોટ ફિક્સિંગની જાળમાં વધુ ચાર ક્રિકેટર્સના નામ બહાર આવી રહ્યા છે. દિલ્હી પોલીસની પૂછપરછ દરમિયાન એસ શ્રીસંત, અંકિત ચવાણ અને અજીત ચંડિલાએ ચાર વધુ ક્રિકેટર્સ પણ ફિક્સિંગમાં સામેલ હોવાનો ખુલાસો કર્યો છે. આ ચારેય ક્રિકેટર્સ અલગ અલગ ટીમના હોવાનું જાણવા મળી રહ્યું છે. તેમાં એક વિદેશી ખેલાડી પણ સામેલ હોવાનું બહાર આવ્યું છે.

જો કે હજી પોલીસને આ ચારેય ક્રિકેટર્સ સામે સ્પોટ ફિક્સિંગના પુરાવા મળ્યા નથી. જેના પગલે ચારે ક્રિકેટર્સની હજી સુધી પૂછપરછ કરવામાં આવી નથી. હવે પોલીસ આ ચારેય ક્રિકેટર્સ સામે પુરાવા એકત્ર કરવામાં લાગી ગઇ છે. આ ફિક્સિંગમાં ફસાયેલા અતુલ ઝાલાએ પોલીસને જણાવ્યું કે તેની દીકરી સાક્ષી ઝાલા ક્રિકેટર શ્રીસંતને મળી હતી. સાક્ષી ઝાલા મહેન્દ્ર સિંહ ધોનીની પત્ની સાક્ષી ધોનીની મિત્ર છે.

પોલીસે સાક્ષી ઝાલાની પૂછપરછ કરી છે. શ્રીસંતે સાક્ષી ઝાલાને એક બ્લેકબેરી Z10 ભેટમાં આપ્યો હતો. અતુલ ઝાલાએ શ્રીસંતને એક ટાઇગરનો ફોટો પણ ભેટમાં આપ્યો હતો. અતુલ ઝાલાએ પોલીસને જણાવ્યું કે 6 મેના રોજ શ્રીસંત જયપુરમાં તેના ઘરે ડિનર માટે આવ્યો હતો. ઉલ્લેખનીય છે કે 5 મેના રોજ જયપુરમાં રાજસ્થાન રોયલ્સની મેચ હતી. દિલ્હી પોલીસની વાત માનવામાં આવે તો આ મેચમાં પણ ફિક્સિંગ થયું હતું.