શાકભાજીની ખેતીમાં ગુજરાત અવ્વલ, ભીંડાના વાવેતર અને ઉત્પાદનમાં દેશમાં પ્રથમ ક્રમે

ગુજરાતે બાગાયતી ખેતીમાં નવી સિદ્ધિ હાંસલ કરી છે. વર્ષ 2023-24 દરમિયાન ભીંડાના વાવેતર અને ઉત્પાદનમાં રાજ્ય દેશમાં મોખરે રહ્યું છે.

રાજ્યના બાગાયત નિયામકના જણાવ્યા અનુસાર, દેશમાં ભીંડાના કુલ વિસ્તાર અને ઉત્પાદન બંને બાબતોમાં ગુજરાત પ્રથમ ક્રમે આવ્યું છે.

આ સમયગાળા દરમિયાન રાજ્યમાં અંદાજે 93,955 હેક્ટરમાં ભીંડાનું વાવેતર થયું હતું. જેમાંથી 11.68 લાખ ટન જેટલું માતબર ઉત્પાદન મળ્યું છે.

આ સફળતામાં સૌરાષ્ટ્ર અને કચ્છના ખેડૂતોનો ફાળો ઘણો મોટો છે. રાજ્યના કુલ વાવેતર વિસ્તારમાં આ પ્રદેશનો હિસ્સો 15 ટકા રહ્યો છે. જ્યારે કુલ ઉત્પાદનમાં સૌરાષ્ટ્ર-કચ્છનું યોગદાન 13 ટકા જેટલું છે. અહીં 12 જિલ્લામાં 1.5 લાખ ટન ભીંડાનું ઉત્પાદન નોંધાયું છે.

ભારતના કુલ શાકભાજી ઉત્પાદનમાં પણ ગુજરાતનો સિંહફાળો છે. વર્ષ 2024-25માં દેશના કુલ ઉત્પાદનમાં રાજ્યનો હિસ્સો 7.66 ટકા રહ્યો છે. સૌરાષ્ટ્ર અને કચ્છમાં આધુનિક ખેતી પદ્ધતિના કારણે શાકભાજીની ઉત્પાદકતા વધી છે. અહીં પ્રતિ હેક્ટર 20.60 મેટ્રિક ટન ઉત્પાદકતા જોવા મળી છે.

સરકારની પ્રોત્સાહક નીતિઓને કારણે રાજ્યની કુલ ખેતીલાયક જમીનના 20 ટકા વિસ્તારમાં હવે બાગાયતી પાકો લેવામાં આવે છે. ખેડૂતોને આર્થિક સહાય પૂરી પાડવા માટે રાજ્ય સરકાર દ્વારા MIDH અને નેશનલ હોર્ટિકલ્ચર મિશન જેવી અનેક યોજનાઓ અમલી છે.

આ યોજનાઓ હેઠળ ખેડૂતોને ગ્રીન હાઉસ, પેક હાઉસ અને કોલ્ડ ચેઈન જેવી સુવિધાઓ ઊભી કરવા માટે સબસિડી આપવામાં આવે છે.

English summary

Gujarat has topped India in bhindi cultivation and production for the 2023-24 agricultural year, with nearly 94,000 hectares and production around 11.68 million tonnes. The southern regions and Kutch contributed significantly, supported by modern farming practices and government schemes such as MIDH and the National Horticulture Mission to build greenhouses, pack houses, and cold chains.