સાબર ડેરીએ એક જ મહિનામાં બીજીવાર દૂધના ભાવ વધાર્યા
સાબર ડેરીએ એક જ મહિનામાં બીજીવાર દૂધના ભાવ વધાર્યા
સાબરડેરી દ્વારા એક જ મહિનામાં બે વખત દૂધના કિલો ફેટે વધારો થતાં પશુ પાલકોમાં ખુશીનો માહોલ જોવા મળી રહ્યો છે. સાબર ડેરીએ પહેલી માર્ચે 10 રૂપિયાનો ભાવ વધારો કર્યો હતો અને આજે વધુ એકવાર દૂધમાં ભાવ વધારો કરાયો છે. ફરી વખત પ્રતિ કિલો ફેટનો 10 રૂપિયા ભાવ વધારો કરાયો છે. પશુ પાલકોની માંગને લઈ સાબર ડેરીએ એક જ માસમાં 20 રૂપિયાનો વધારો કરી દીધો છે. ગુજરાતના તમામ દૂધ સંઘો કરતાં સાબર ડેરીનો ભાવ સૌથી વધુ છે.
જો ભાવની વાત કરીએ તો સાબર ડેરી દ્વારા કિલો ફેટ હવે ભેંસના 730 અને ગાયના 313.60 અપાયો છે. આ ભાવ વધારો 21 માર્ચથી અમલી કરવામાં આવ્યો છે.
GMFCના ચેરમેન, શામળભાઈ પટેલે શું કહ્યું? અહીં વાંચો
"સાબર ડેરીએ ચાલુ વર્ષે પશુપાલકોના હિત માટે 1-3-2022થી 10 રૂપિયા કિલો ફેટે ભાવ વધાર્યો હતો, અને આજે 21 માર્ચ 2022થી બીજા 10 રૂપિયાનો ભાવ વધારો કર્યો છે. આ ભાવ વધારા બાદ કિલો ફેટે ભેંસના 730 રૂપિયા ભાવ પશુ પાલકોને ચૂકવવાનું ડેરી બોર્ડે નક્કી કર્યું છે. જ્યારે ગાયને કિલો ફેટે 313.60 રૂપિયા ભાવ ચૂકવવાનું નક્કી કરેલ છે. દાણચારાના ભાવ અને કાચાના માલના ભાવ વધવાના કારણે પશુપાલકોનો ખર્ચ વધતો હતો અને તેમને પોસાતું નહોતું તેથી તેમની દૂધમાં પણ ભાવ વધારાની માંગ હતી. નિયામકોને પણ આ માંગ યોગ્ય લાગતાં પશુ પાલકો માટે ભાવ વધારો કરવાનું નક્કી કર્યું."