Gold price today : ચીન-અમેરિકાના ટેરિફ વોર વચ્ચે સોનાના ભાવમાં ભડકો, જાણો લેટેસ્ટ ભાવ

Gold price today : ચીન અને અમેરિકા વચ્ચે વધી રહેલા ટેરિફ વિવાદની સીધી અસર સોનાના બજાર પર જોવા મળી રહી છે. વૈશ્વિક સ્તરે ઉભી થયેલી અનિશ્ચિત પરિસ્થિતિઓના કારણે રોકાણકારો સુરક્ષિત રોકાણ તરીકે સોનાની ખરીદી તરફ વળ્યા છે, જેના કારણે તેની કિંમતમાં નોંધપાત્ર વધારો થયો છે.

અખિલ ભારતીય સર્રાફા સંઘના જણાવ્યા અનુસાર, શુક્રવારે સોનાની કિંમતમાં એક જ દિવસમાં 6,250 રૂપિયાનો વધારો જોવા મળ્યો છે.

હાલ દિલ્હીની બજારમાં 10 ગ્રામ 99.9% શુદ્ધતા ધરાવતા સોનાનો ભાવ 96,450 સુધી પહોંચી ગયો છે, જે અત્યાર સુધીનો સૌથી ઊંચો છે. ગુરુવારે આ ભાવ 90,200 હતો. એટલે કે એક દિવસમાં 6,250નો વધારો નોંધાયો છે.

99.5% શુદ્ધતા ધરાવતા સોનાની કિંમત પણ ઉછળી છે. બુધવારે જે સોનાનો ભાવ 89,750 હતો તે શુક્રવારે વધીને 96,000 પર પહોંચી ગયો છે. સતત ચાર દિવસના ઘટાડા બાદ સોનામાં આવી તેજી નોંધાઈ છે.

સોનાની સાથે સાથે ચાંદીના ભાવમાં પણ મોટો ઉછાળો નોંધાયો છે. ચાંદીના ભાવમાં 2,300નો ઉછાળો આવ્યો છે અને એક કિલોગ્રામ ચાંદી 95,500ના સ્તરે પહોંચી ગઈ છે. અગાઉ તેનો ભાવ 93,200 હતો. વૈશ્વિક માંગ વધવાના કારણે ચાંદીમાં પણ તેજી જોવા મળી છે.

એમસીએક્સ (MCX) પ્લેટફોર્મ પર જૂન મહિનાની ડિલિવરી માટે સોનાના ફ્યુચર કોન્ટ્રાક્ટમાં પણ ભાવ ઉછળી ગયા છે. અહીં 10 ગ્રામ સોનાનો ભાવ 1,703ના વધારા સાથે 93,736 સુધી પહોંચી ગયો છે.

અંતરરાષ્ટ્રીય સ્તરે પણ સોનાના ભાવોમાં તેજી નોંધાઈ છે. હાજર સોનાનો ભાવ $3,237.39 પ્રતિ ઔંસ સુધી પહોંચ્યો છે. એશિયાઈ બજારમાં કોમેક્સ ગોલ્ડ ફ્યુચરનો ભાવ વધીને $3,249.16 પ્રતિ ઔંસના સ્તરે પહોંચી ગયો છે, જે એક રેકોર્ડ સ્તર છે. સ્પષ્ટ છે કે વૈશ્વિક સ્તરે સોનામાં ઊંચી માંગ જોવા મળી રહી છે.

ચીન-અમેરિકા વચ્ચેના ટેરિફ વિવાદના કારણે વૈશ્વિક અર્થતંત્રમાં અનિશ્ચિતતા વધી રહી છે. આવી સ્થિતિમાં સોનું એક સલામત રોકાણ વિકલ્પ બની ગયું છે, જેને કારણે તેની કિંમતો સતત ઊંચા સ્તર સર કરી રહી છે.

English summary

Gold Price Today: Surge in Rates Amid China-US Tariff War Tensions