હિંડનબર્ગ કેસમાં અદાણી ગ્રુપની તપાસ માટે સુપ્રીમ કોર્ટે 6 સભ્યોની પેનલની કરી રચના

હિંડનબર્ગ રિપોર્ટ સામે આવ્યા બાદ અદાણી ગ્રુપ મામલે થયેલા હોબાળા બાદ સુપ્રીમ કોર્ટે હવે તપાસ માટે છ સભ્યોની એક્સપર્ટ કમિટીની રચના કરી છે.

Adani Group: હિંડનબર્ગ રિપોર્ટ સામે આવ્યા બાદ અદાણી ગ્રુપ સાથે તપાસની માંગ ઉઠી છે. આ સમગ્ર મામલે સુપ્રીમ કોર્ટે હવે તપાસ માટે છ સભ્યોની એક્સપર્ટ કમિટીની રચના કરી છે. આ કમિટીમાં ઓપી ભટ્ટ, રિટાયર્ડ જજ જેપી દેવદત્ત, નંદન નિલેકણિ, કેવી કામથ, સોમશેખરન સુંદરસન સામેલ છે. રિટાયર્ડ જજ જસ્ટીસ એએમ સાપરે આ કમિટીની અધ્યક્ષ રહેશે.

નોંધનીય છે કે ચીફ જસ્ટિસ ડીવાય ચંદ્રચુડ, જસ્ટિસ પીએસ નરસિમ્હા અને જસ્ટિસ જેબી પાદરીવાલાની બનેલી સુપ્રીમ કોર્ટની બેન્ચે આ નિષ્ણાત સમિતિની રચના કરી છે. આ સમિતિમાં 6 સભ્યોની વાત કરીએ તો, ઓપી ભટ્ટ સ્ટેટ બેંક ઓફ ઈન્ડિયાના ભૂતપૂર્વ ચેરમેન છે, નંદન નીલેકણી ઈન્ફોસિસના ભૂતપૂર્વ સહ-સ્થાપક અને ઉદ્યોગપતિ છે. કે.વી. કામથ, ઇન્ફોસિસના ભૂતપૂર્વ ચેરમેન, ન્યૂ ડેવલપમેન્ટ બેન્કના ભૂતપૂર્વ વડા, ICICI બેન્કના નોન-એક્ઝિક્યુટિવ ચેરમેન છે. સોમશેખર સુંદરેસન વરિષ્ઠ વકીલ છે.

તમને જણાવી દઈએ કે અદાણી ગ્રુપની તપાસની માંગને લઈને સુપ્રીમ કોર્ટમાં અરજી દાખલ કરવામાં આવી હતી. આ અરજીઓ પર સુનાવણી કરીને સુપ્રીમ કોર્ટે તપાસ સમિતિની રચના કરી છે. સુપ્રીમ કોર્ટે સુનાવણી દરમિયાન કહ્યુ કે નિષ્ણાત સમિતિ બે મહિનામાં પોતાનો રિપોર્ટ સીલબંધ કવરમાં ફાઇલ કરશે. આ સાથે સુપ્રીમ કોર્ટે સેબીને આ સમિતિને દરેક માહિતી આપવાનો નિર્દેશ આપ્યો છે. કોર્ટે કહ્યુ કે આ સમિતિનુ કામ માળખાને મજબૂત કરવાના ઉપાયો સૂચવવાનુ છે.

English summary

SC set up 6-member panel to probe the Adani Group in the Hindenburg case