T20 World Cup 2026: હવે શરૂ થશે અસલી વર્લ્ડ કપ, સુપર-8ની ટીમો તૈયાર

By Desk

Published: Thursday, February 19, 2026, 10:31 [IST]

T20 World Cup 2026 Super 8 Schedule: ટી20 વર્લ્ડ કપ 2026 હવે તેના સૌથી રોમાંચક તબક્કે પહોંચી ગયો છે. ગ્રુપ સ્ટેજની રસાકસી ભરી મેચો બાદ હવે 20માંથી માત્ર 8 ટીમો જ ખિતાબની રેસમાં બાકી રહી છે. ગ્રુપ-A માંથી ભારત અને પાકિસ્તાન, ગ્રુપ-B માંથી શ્રીલંકા અને ઝિમ્બાબ્વે, ગ્રુપ-C માંથી વેસ્ટ ઈન્ડિઝ અને ઈંગ્લેન્ડ, જ્યારે ગ્રુપ-D માંથી દક્ષિણ આફ્રિકા અને ન્યુઝીલેન્ડે સુપર-8માં પોતાનું સ્થાન નિશ્ચિત કર્યું છે.

આ ટીમો વચ્ચે થશે મુકાબલો (T20 World Cup 2026 Super 8 Schedule)

ક્વોલિફાય થયેલી આઠ ટીમોને બે અલગ-અલગ ગ્રુપ (ગ્રુપ 1 અને ગ્રુપ 2) માં વહેંચવામાં આવી છે. દરેક ગ્રુપમાં ચાર ટીમો રાખવામાં આવી છે.

ગ્રુપ 1: ભારત, ઝિમ્બાબ્વે, વેસ્ટ ઈન્ડિઝ અને દક્ષિણ આફ્રિકા.
ગ્રુપ 2: પાકિસ્તાન, શ્રીલંકા, ઈંગ્લેન્ડ અને ન્યુઝીલેન્ડ.

નિયમો અનુસાર, દરેક ટીમે પોતાના ગ્રુપની બાકીની ત્રણેય ટીમો સામે એક-એક મેચ (રાઉન્ડ રોબિન આધારે) રમવી પડશે.

કેવી રીતે મળશે સેમીફાઇનલની ટિકિટ?

આ મેચો પૂરી થયા બાદ બંને ગ્રુપની ટોચની બે ટીમો સેમીફાઇનલ માટે ક્વોલિફાય થશે. સેમીફાઇનલ મુકાબલા 4 અને 5 માર્ચે રમાશે, જ્યારે ફાઈનલ મેચ 8 માર્ચે યોજાશે. ભારતીય ટીમ ગ્રુપ-1 માં છે અને સેમીફાઇનલ સુધી પહોંચવા માટે તેણે દક્ષિણ આફ્રિકા, ઝિમ્બાબ્વે અને વેસ્ટ ઈન્ડિઝ જેવી ટીમોના પડકારને પાર કરવો પડશે. ભારતનો પ્રથમ મુકાબલો 22 ફેબ્રુઆરીએ અમદાવાદમાં દક્ષિણ આફ્રિકા સામે થશે.

ભારતને રહેવું પડશે સાવધાન

ત્યારબાદ ટીમ ઇન્ડિયા 26 ફેબ્રુઆરીએ ચેન્નાઈમાં ઝિમ્બાબ્વે અને 1 માર્ચના રોજ કોલકાતામાં વેસ્ટ ઈન્ડિઝ સામે ટકરાશે. સુપર-8 તબક્કામાં નેટ રન રેટ (NRR) ની ભૂમિકા ખૂબ જ મહત્વની રહેશે. દરેક ટીમને ગ્રુપમાં માત્ર ત્રણ જ મેચ મળવાની હોવાથી, એક હાર પણ સેમીફાઇનલની રાહ મુશ્કેલ બનાવી શકે છે. ભારતીય ટીમ માટે સારી વાત એ છે કે તે ગ્રુપ સ્ટેજમાં અજેય રહી છે, પરંતુ અભિષેક શર્માનું ફોર્મ અને સ્પિન સામે મિડલ ઓર્ડરનો સંઘર્ષ એવા પડકારો છે જેના પર કેપ્ટન સૂર્યકુમાર યાદવે તાત્કાલિક ધ્યાન આપવું પડશે.