5 Reasons : જોવી જ જોઇએ રજનીકાંતની લિંગા...

| Published: Friday, December 12, 2014, 15:40 [IST]

મુંબઈ, 12 ડિસેમ્બર : સાઉથના સુપરસ્ટાર રજનીકાંતની મોસ્ટ અવેટેડ ફિલ્મ લિંગા આજે તેમના જન્મ દિવસે રિલીઝ થઈ ગઈ છે. કે એસ રવિકુમાર દિગ્દર્શિત લિંગામાં રજનીકાંત સાથે સોનાક્ષી સિન્હા અને અનુષ્કા શેટ્ટી મુખ્ય ભૂમિકાઓમાં છે. બીજી બાજુ આ ફિલ્મમાં એક નહીં, પણ બે-બે રજનીકાંત નજરે પડશે. લગભગ 100 કરોડ રુપિયાના ખર્ચે નિર્મિત લિંગામાં સંગીત એ આર રહમાને આપ્યું છે.

લિંગા દેશ-વિદેશમાં એક સાથે 5 હજાર થિયેટરોમાં આજે રિલીઝ થઈ છે. આ ફિલ્મ જોવા માટે લોકો એટલા ઉતાવળા હતાં કે ચેન્નઈના કાસી થિયેટરમાં ફૅન્સ બેકાબૂ બની ગયાં અને તેથી ત્યાં અફરા-તફરી મચી ગઈ.

ખેર, અમે પણ જાણીએ છીએ કે આપ પણ લિંગા ફિલ્મ જોવા માટે ઉત્સુક અને ઇચ્છુક હશો, પણ અમે અહીં ફિલ્મ સાથે જોડાયેલી એવી 5 વાતો બતાવવા જઈ રહ્યા છીએ કે જે વાંચ્યા બાદ આપનો નિર્ણય વધુ પાક્કો થઈ જશે.

જન્મ દિવસે રિલીઝ - રજનીકાંતના 40 વર્ષોના ફિલ્મી કૅરિયરમાં આ પહેલી ફિલ્મ છે કે જે તેમના જન્મ દિવસ પ્રસંગે રિલીઝ થઈ છે. એટલે કે એક જ દિવસે બે-બે ઉજવણીઓ, તો બીજી બાજુ પોતાની બીમારીમાંથી સાજા થયા બાદ પણ આ તેમની પહેલી ફિલ્મ છે.

રવિ-રજનીનો તડકો - દિગ્દર્શક કે એસ રવિકુમાર અને રજનીકાંતનો સુપરહિટ તડકો વધુ એક વાર દમદાર રીતે પરત ફર્યો છે. આ અગાઉ રજની-રવિએ 7 ફિલ્મોમાં સાથે કામ કર્યું છે. તેમની ફિલ્મ મુત્થુ સુપરહિટ બ્લૉકબસ્ટર હતી. આ ફિલ્મ ખાસ જાપાનમાં પસંદ કરાઈ હતી.

સોનાક્ષીનું ડેબ્યુ - લિંગા સાથે સોનાક્ષી સન્હાએ સાઉથની ફિલ્મ ઇન્ડસ્ટ્રીમાં ડેબ્યુ કર્યું છે, તો બીજી બાજુ રજનીકાંતે પણ સોનાના કામના ખૂબ વખાણ કર્યા છે. એટલે જો આપે સુપરસ્ટાર રજનીકાંત અને સોનાક્ષી સિન્હાની જોડી તથા તેમનો રોમાંસ જોવો હોય, તો આ ફિલ્મ ચોક્કસ જોવી પડશે. ફિલ્મમાં અનુષ્કા શેટ્ટી પણ લીડ રોલમાં છે.

રહમાનનું સંગીત - લિંગામાં સંગીત આપ્યું છે એ આર રહમાને. આ ફિલ્મના ગીતો ઘણા પસંદ કરાઈ રહ્યા છે અને રેડિયોથી માંડી યૂટ્યુબ સુધી ગીતો રેકૉર્ડ્સ તોડી રહ્યાં છે. ખેર, એ આર રહમાન જેવા સંગીતકારનું સંગીત સાંભળવા પણ આ ફિલ્મ જોવી જ જોઇએ.

પહેલા જ દિવસે હિટ - જો આપ તામિળ સિનેમા, રજનીકાંતના ફૅન હોવ, તો આ ફિલ્મ જોવા જવી જ પડે. આપને જણાવી દઇએ કે રિલીઝ થતા પહેલા જ લિંગાના ટ્રેલરને યૂટ્યુબ પર 46 લાખ લોકોએ જોયું અને આ સંખ્યા સતત વધી રહી છે. આપને એ પણ જણાવી દઇએ કે લિંગાએ રિલીઝ પહેલા જ 120 કરોડની કમાણી કરી લીધી છે. ઇરોઝ ઇંટરનેશનલે લિંગાના ડિસ્ટ્રીબ્યૂશન રાઇટ્સ 120 કરોડ રુપિયામાં ખરીદ્યા છે.