Pics : કાશ! સિદ્ધૂવાણી કેબીસીમાં ઉપયોગ કરી શકું : અમિતાભ

Updated: Saturday, April 20, 2013, 11:24 [IST]

મુંબઈ, 20 એપ્રિલ : બિગ બી અમિતાભ બચ્ચને પૂર્વ ક્રિકેટર નવજોત સિંહ સિદ્ધૂની વેબસાઇટ શેરીઑનટૉપ ડૉટ કૉમ લૉન્ચ કરતાં જણાવ્યું કે કાશ! તેઓ સિદ્ધૂવાણીનો ઉપયોગ કેબીસીમાં કરી શકે.

અમિતાભે સિદ્ધૂને હાજરજવાબ નવયુવાન ગણાવતાં તેમના વખાણ કર્યાં અને જણાવ્યું કે તેઓ હવે સિદ્ધૂના ઉદાહરણો કૌન બનેગા કરોડપતિમાં ઉપયોગ કરવાનું પસંદ કરશે.

70 વર્ષીય અમિતાભ બચ્ચને વેબસાઇટ લૉન્ચ કર્યા બાદ મીડિયા સાથે વાતચીત કરતાં જણાવ્યું - આ નવયુવાન પ્રત્યે મને ઉંડી શ્રદ્ધા છે. જીવનના વિવિધ પ્રસંગો ઉપર જે રીતે તેઓ બોલે છે, મને હંમેશા સારૂં લાગતું રહ્યું છે. અમિતાભે જણાવ્યું - મને આશ્ચર્ય થાય છે ક તેઓ કેવી રીતે આવા અદ્ભુત ઉદાહરણો યાદ રાખે છે. હું સાચે જ તેમનાથી ખૂબ પ્રભાવિત છું. કેટલું સારૂં થાત કે હું તેમનામાંથી કેટલાંક ઉદાહરણો પોતાના શો કેબીસીમાં યૂઝ કરી શકું.

બૉલીવુડના મહાનાયકે નવજોત સિંહ સિદ્ધૂના ખડખડાટ હાસ્યની પણ ખૂબ પ્રસંશા કરી. આ પ્રસંગે પૂર્વ ક્રિકેટર કપિલ દેવ પણ ઉપસ્થિત હતાં. નવી વેબસાઇટને સિદ્ધૂના ડિજિટલ અવતાર ગણવામાં આવી રહી છે. વેબસાઇટ ઉપર તેમનું બ્લૉગ હશે. લોકો તેના માધ્યમથી સિદ્ધૂ સાથે સીધી વાતચીત પણ કરી શકશે.