બૉબી ચાવલાનુ બેસણુ : જુહીને સાંત્વન આપવાં ઉમટ્યું બૉલીવુડ

Updated: Wednesday, February 4, 2015, 11:34 [IST]

મુંબઈ, 12 માર્ચ : બૉલીવુડ અભિનેત્રી જુહી ચાવલાના ભાઈ બૉબી ચાવલાનું બેસણું ગઈકાલે યોજાયું કે જેમાં બૉલીવુડમાંથી મોટી-મોટી હસ્તીઓએ હાજરી આપી અને જુહી ચાવલાને સાંત્વન આપ્યું. અમિતાભ બચ્ચન અને અભિષેક બચ્ચનથી લઈ શાહરુખ ખાન અને માધુરી દીક્ષિત સુધીની બૉલીવુડ હસ્તીઓએ બૉબીના બેસણામાં પહોંચી બૉબીના આત્માના શાંતિ અર્થે પ્રાર્થના કરી.

જુહી ચાવલાના મોટા ભાઈ બૉબી ચાવલાનું ગત રવિવારે જસલોક હૉસ્પિટલ ખાતે નિધન થઈ ગયું હતુ. બૉબી વર્ષ 2010થી કૉમામાં હતાં, પરંતુ ગત રવિવારે સવારે સાત વાગ્યે તેમનું નિધન થઈ ગયું. બૉબી ચાવલા લાંબા સમયથી બીમાર હતાં. એપ્રિલ-2010માં એક રેસ્ટોરંટમાં ડિનર દરમિયાન બૉબી ચાવલા હૃદય રોગના હુમલાનો ભોગ બન્યા હતાં અને તે પછી તેઓ કૉમામાં જતા રહ્યા હતાં. તેમનું નિધન થતાં બૉલીવુડમાં શોકની લહેર વ્યાપી ગઈ હતી.

બૉબીના નિધનના સમાચાર મળતાં જ જુહીના પરમ મિત્ર તથા કિંગ ખાન શાહરુખ ખાન તરત જ ચેન્નઈથી ફ્લાઇટ પકડીને મુંબઈ આવી પહોંચ્યાં અને જુહીને સધિયારો આપ્યો હતો.શાહરુખ ખાન બૉબીના અંતિમ સંસ્કારમાં જ નહીં, પણ ગઈકાલે યોજાયેલ બેસણામાં પણ ઉપસ્થિત રહ્યા હતાં, તો ગુલાબ ગૅંગ ફિલ્મમાં જુહીના સહ-કલાકાર માધુરી દીક્ષિત કે જેઓ અંતિમ સંસ્કાર વખતે હાજર નહોતા રહી શક્યાં, તેઓ બેસણામાં હાજર રહ્યા હતાં.

ચાલો તસવીરોમાં જોઇએ કે બૉબી ચાવલાના બેસણામાં કોણ-કોણ હાજર રહ્યું :