આ હસ્તીઓ માટે વોટિંગ કરતા આઇફા વધારે મહત્વપૂર્ણ!

Updated: Friday, April 25, 2014, 14:05 [IST]

એક તરફ જ્યાં શાહરુખ ખાનથી લઇને અમિતાભ બચ્ચન, વિદ્યા બાલન, કરીના કપૂર ખાન, સોનમ કપૂર, પ્રીતિ ઝિન્ટા, આમીર ખાન જેવા સુપરસ્ટાર્સ મતદાનના દિવસે મુંબઇમાં રહીને દેશને એક સારું ભવિષ્ય આપવા માટે પોતાની વિચારસરણી અનુસાર એક સારી પાર્ટીને વિજયી બનાવવા મતદાનમાં ભાગ લઇ રહ્યાં છે તો બીજી તરફ કેટલાક એવા સ્ટાર્સ પણ છે, જેમના માટે દેશ કરતા વધારે આઇફા એવોર્ડ મહત્વપૂર્ણ છે. આ સેલિબ્રિટી વોટિંગના એક દિવસ પહેલા જ ફ્લોરિડામાં શરૂ થવા જઇ રહેલા આઇફા એવોર્ડમાં સામેલ થવા જઇ ચૂક્યા છે. હવે જ્યારે દેશની જનતાને સૌથી વધારે પ્રભાવિત કરનારા આ સિતારાઓ પોતે જ પોતાની જવાબદારીને નથી સમજી રહ્યાં તો પછી અન્યોને કેવી રીતે દોષી કહેવા.

મતદાન કરનારા સિતારાઓ અંગે વાત કરીએ તો શાહરુખ ખાન, આમીર ખાન, વિદ્યા બાલન, દીપિકા પાદૂકોણ, રણવીર સિંહ, રણબીર કપૂર, ફરહાન અખ્તર, સોનમ કપૂર, પ્રીતી ઝિન્ટા, મધુ, વિગેરે સામેલ છે, પરંતુ આ ઉપરાંત કેટલાક કલાકાર જેમકે સૈફ અલી ખાન, શાહિદ કપૂર, વિવેક ઓબરોય, રિચા ચઢ્ઢા, અદિતી રાવ હૈદરી, સોનાક્ષી સન્હા, શબાના આઝમી ઘણા દિવસ પહેલા જ આઇફા એવોર્ડ માટે ફ્લોરિડા પહોંચી ગયા છે.

આ ઉપરાંત તેમજ કેટલાક બૉલીવુડ અભિનેતા અને અભિનેત્રી જેમકે રિતિક રોશન, માધુરી દીક્ષિત, બોમની ઇરાની, કરીના કપૂર અને દિવ્યા દત્તા પણ વોટિંગના એક દિવસ પહેલા ફ્લોરિડા જવા માટે રવાના થયા છે. તેવામાં જનતાને સૌથી વધુ પ્રભાવિત કરતા સિતારા જ પોતાના મતાધિકારને મહત્વ ન આપતા હોય અને પૈસા અને એવોર્ડ્સને વધારે મહત્વ આપી રહ્યાં છે તો પછી આમ જનતા તેમની પાસેથી શું શીખશે. એક તરફ આમીર ખાન, અમિતાભ બચ્ચન પોતાના શો, ફિલ્મો થકી લોકોને મત આપવા માટે ઉત્સાહિત કરી રહ્યાં છે તો બીજી તરફ આ સિતારાઓ તેમની મહેનત પર પાણી ફેરવી રહ્યાં છે.