Money Laundering Case: પહેલીવાર આમને-સામને આવ્યા જેકલીન-સુકેશ, જાણો કોર્ટમાં શું થયુ?
200 કરોડના ફ્રોડ કેસની પટિયાલા હાઉસ કોર્ટમાં કેસની કાર્યવાહી શરૂ થઈ ગઈ છે અને સુકેશ અને જેકલીન બંને આ વખતે પહેલીવાર કોર્ટરૂમમાં એકસાથે હાજર છે.
200 કરોડના ફ્રોડ કેસમાં જેકલીન ફર્નાન્ડિસની મુશ્કેલીઓ અટકવાનું નામ નથી લઈ રહી. હાલમાં તે દિલ્હીની પટિયાલા હાઉસ કોર્ટમાં હાજર છે જ્યાં ED તેની સતત પૂછપરછ કરી રહી છે. પટિયાલા હાઉસ કોર્ટમાં કેસની કાર્યવાહી શરૂ થઈ ગઈ છે અને સુકેશ અને જેકલીન બંને આ વખતે પહેલીવાર કોર્ટરૂમમાં એકસાથે હાજર છે.
જેકલીન - સુકેશ આમને સામને
તમને જણાવી દઈએ કે સુકેશ ચંદ્રશેખરના મની લોન્ડરિંગ કેસમાં સંડોવાયેલી જેકલીન ફર્નાન્ડિસ વિરુદ્ધ ચાર્જશીટ દાખલ કરવામાં આવી છે. હાલમાં કોર્ટ રૂમમાં અભિનેત્રી પાસેથી સતત સવાલ-જવાબ પૂછવામાં આવી રહ્યા છે. આજે આ સુનાવણીમાં સુકેશ ચંદ્રશેખર પણ જેકલીન સાથે પ્રથમ વખત હાજર રહ્યા હતા. કોર્ટમાં સુનાવણી દરમિયાન બંને કોર્ટ રૂમમાં હાજર રહ્યા હતા અને આ દરમિયાન ચર્ચા ચાલી હતી.
જેકલીને માંગી વિદેશ જવાની પરમિશન
જેકલીને કોર્ટરૂમમાં વિદેશ જવાની પરવાનગી માંગી છે. જેના પર કોર્ટ વિચારણા કરશે અને 22 ડિસેમ્બર સુધીમાં ચુકાદો આપશે. તમને જણાવી દઈએ કે આ પહેલા જેકલીન પર ગુપચુપ રીતે દેશ છોડવાનો આરોપ લાગ્યો હતો. EDનો આરોપ છે કે અભિનેત્રીએ પરવાનગી વગર વિદેશ જવાની યોજના બનાવી હતી. જો કે હવે જોવાનું રહેશે કે કોર્ટ તેમને જવા દેશે કે નહી.
20 ડિસેમ્બર સુધી ટળી હતી સુનવણી
તમને જણાવી દઈએ કે આ પહેલા 12 ડિસેમ્બરે જેકલીન ઠગ સુકેશ ચંદ્રશેખર સાથે જોડાયેલા 200 કરોડ રૂપિયાના મની લોન્ડરિંગ કેસમાં દિલ્હીની પટિયાલા હાઉસ કોર્ટમાં હાજર થઈ હતી. EDએ આરોપ ઘડતા પહેલા અભિનેત્રીની પૂછપરછ પણ કરી હતી. જોકે, બાદમાં સુનાવણીની તારીખ 20 ડિસેમ્બર સુધી ટાળી દેવામાં આવી હતી. હાલમાં માસ્ટરમાઇન્ડ સુકેશ ચંદ્રશેખરને તિહાર જેલમાં રાખવામાં આવ્યો છે.