રામ ગોપાલ વર્માને ‘માસ્ટર ઑફ હૉરર ફિલ્મ’ ગણાવતાં જેડી

Updated: Wednesday, February 4, 2015, 14:29 [IST]

મુંબઈ, 4 ઑક્ટોબર : ફિલ્મ ભૂત દ્વારા સૌને ડરાવનાર નિર્માતા-દિગ્દર્શક રામ ગોપાલ વર્મા ફરી એક વાર લોકોને ડરાવવાની તૈયારી કરી ચુક્યાં છે. આ વખતે તેઓ ભૂત રિટર્ન્સ લઈને આવી રહ્યાં છે જેના વડે સિને દર્શકો વચ્ચે ફરી એક વાર નેપાળી બાળા મનીષા કોઈરાલા પ્રત્યક્ષ થવા જઈ રહી છે. રામ ગોપાલ વર્માની છેલ્લી ઘણી ફિલ્મો બૉક્સ ઑફિસ બુરી રીતે પિટાઈ છે. તેથી તેઓ ફરીથી હૉરર ફિલ્મો તરફ વળ્યાં છે.

પોતાના બેધડક નિવેદનો દ્વારા લોકોને નારાજ કરનાર રામ ગોપાલ વર્માને જે. ડી. ચક્રવર્તી હૉરર ફિલ્મોના માસ્ટર ગણે છે. શિવા, સત્યા અને વાસ્તુશાસ્ત્ર જેવી ફિલ્મોમાં રામૂ સાથે કામ કરી ચુકેલા જેડી કહે છે કે રામૂની જેમ હૉરર ફિલ્મો બીજું કોઈ ન બનાવી શકે. મને તેમની સાથે કામ કરતાં મજા આવે છે. જેડીએ કહ્યું કે મારો દાવો છે કે રામૂ ઓછાં બજેટમાં સારી ફિલ્મો બનાવે છે કે જે લોકો માટે દૃષ્ટાંત બની જાય છે. તેમની ભૂત રિટર્ન્સ પણ વર્ષ 2003માં આવેલી ભૂતની જેમ જ સફળતા હાસલ કરશે.

અમે આપને જણાવી દઇએ કે રામ ગોપાલ વર્મા દિગ્દર્શિત ફિલ્મ ભૂત રિટર્ન્સ આગામી 12મી ઑક્ટોબરે રિલીઝ થવાની છે. ફિલ્મમાં મનીષા કોઈરાલા અને જેડી મુખ્ય ભૂમિકામાં છે. જેડીની રામૂ સાથે આ 27મી ફિલ્મ છે. તેમાં હિન્દી અને દક્ષિણની ફિલ્મનો સમાવેશ થઈ જાય છે.