Oscars 2026: ઓસ્કારની રેસમાં ભારતનો દબદબો, 'હોમબાઉન્ડ' અને 'કાંતારા' સહિત 5 ફિલ્મોએ મેળવી જગ્યા
Oscars 2026: વિશ્વના સૌથી પ્રતિષ્ઠિત ફિલ્મ એવોર્ડ એટલે કે 'ઓસ્કાર' (એકેડેમી એવોર્ડ્સ) 2026 માટે ભારત તરફથી ખૂબ જ ઉત્સાહજનક સમાચાર સામે આવ્યા છે. આ વખતે એક-બે નહીં પણ કુલ 5 ભારતીય ફિલ્મો અલગ-અલગ શ્રેણીઓમાં ઓસ્કારની રેસમાં સામેલ થઈ છે. જેમાં નીરજ ઘેવાનની 'હોમબાઉન્ડ' થી લઈને ઋષભ શેટ્ટીની 'કાંતારા: ચેપ્ટર 1' સુધીની ફિલ્મોએ પોતાની જગ્યા બનાવી છે.
'હોમબાઉન્ડ' ભારતની સત્તાવાર એન્ટ્રી
દિગ્ગજ નિર્દેશક નીરજ ઘેવાનની ફિલ્મ 'હોમબાઉન્ડ' ને ભારત તરફથી 'શ્રેષ્ઠ આંતરરાષ્ટ્રીય ફીચર ફિલ્મ' શ્રેણી માટે સત્તાવાર એન્ટ્રી તરીકે પસંદ કરવામાં આવી છે. આ ફિલ્મમાં ઈશાન ખટ્ટર, જાનહવી કપૂર અને વિશાલ જેઠવા મુખ્ય ભૂમિકામાં છે. ઓસ્કારની આ કેટેગરીમાં દર વર્ષે ભારત તરફથી માત્ર એક જ ફિલ્મ સત્તાવાર રીતે મોકલવામાં આવે છે અને આ વર્ષે પસંદગી સમિતિએ 'હોમબાઉન્ડ' પર પસંદગીનો કળશ ઢોળ્યો છે.
શ્રેષ્ઠ ફિલ્મ કેટેગરીમાં 'કાંતારા' અને 'તન્વી ધ ગ્રેટ'
સત્તાવાર એન્ટ્રી સિવાય, અન્ય બે મોટી ફિલ્મોએ પણ સ્વતંત્ર રીતે ઓસ્કારની 'બેસ્ટ પિક્ચર' (શ્રેષ્ઠ ફિલ્મ) કેટેગરીમાં એન્ટ્રી કરીને આશ્ચર્ય સર્જ્યું છે.
- કાંતારા: ચેપ્ટર 1: ઋષભ શેટ્ટીની આ બ્લોકબસ્ટર ફિલ્મ 2022ની 'કાંતારા'ની પ્રીક્વલ છે. તેના ભવ્ય નિર્માણ અને વાર્તાને કારણે તેણે એકેડેમીના કડક ધોરણોને પૂર્ણ કર્યા છે.
- તન્વી ધ ગ્રેટ: અનુપમ ખેર દ્વારા નિર્દેશિત આ ફિલ્મ ઓટિઝમ અને સપનાઓ જેવા સંવેદનશીલ વિષયો પર આધારિત છે. 23 વર્ષ પછી નિર્દેશનમાં પરત ફરેલા અનુપમ ખેર માટે આ મોટી સિદ્ધિ છે.
એકેડેમી ઓફ મોશન પિક્ચર આર્ટ્સ એન્ડ સાયન્સ દ્વારા જાહેર કરવામાં આવેલી વિશ્વની 201 લાયક ફિલ્મોની યાદીમાં આ બંને ફિલ્મોનો સમાવેશ કરવામાં આવ્યો છે.
શું હોય છે પસંદગીના માપદંડ?
ઘણીવાર લોકોને પ્રશ્ન થાય છે કે સત્તાવાર એન્ટ્રી સિવાય ફિલ્મો કેવી રીતે ઓસ્કારમાં પહોંચે છે? તો જાણવું જરૂરી છે કે 'શ્રેષ્ઠ ફિલ્મ' શ્રેણી માટે કોઈપણ દેશની સીમા હોતી નથી. જો કોઈ ફિલ્મ એકેડેમી દ્વારા નક્કી કરાયેલ ટેકનિકલ ફોર્મેટ, થિયેટર પ્રદર્શન અને વિવિધતાના નિયમોનું પાલન કરે, તો તે સીધી આ રેસમાં જોડાઈ શકે છે. 'કાંતારા' અને 'તન્વી ધ ગ્રેટ' આ તમામ માપદંડોમાં ખરી ઉતરી છે.
22 જાન્યુઆરી પર સૌની નજર
હાલમાં આ ફિલ્મો શોર્ટલિસ્ટ અથવા લાયક ફિલ્મોની યાદીમાં છે. હવે આખી દુનિયાની નજર 22 જાન્યુઆરી પર છે, જ્યારે ઓસ્કાર માટેના અંતિમ નોમિનેશન (નામાંકન) જાહેર કરવામાં આવશે. ત્યારે જ સ્પષ્ટ થશે કે કઈ ભારતીય ફિલ્મ ઓસ્કારની સ્ટેજ સુધી પહોંચવામાં સફળ રહેશે.
ભારતીય સિનેમા માટે ગર્વની ક્ષણ: એક સાથે 5 ફિલ્મોનું ઓસ્કારની વિવિધ કેટેગરીમાં હોવું એ દર્શાવે છે કે ભારતીય કન્ટેન્ટ હવે વૈશ્વિક સ્તરે મજબૂત રીતે સ્વીકારાઈ રહ્યું છે.
Click it and Unblock the Notifications
Sign in with Google
