Sad News : શશિ કપૂર હૉસ્પિટલમાં, મૉડેલ એકતા બબ્બરનો આપઘાત!

Published: Monday, September 22, 2014, 11:52 [IST]

મુંબઈ, 22 સપ્ટેમ્બર : ગ્લૅમર જગતમાંથી બે સમાચારો આવી રહ્યા છે કે જેમાં એક ચિંતાજનક સમાચાર એ છે કે બૉલીવુડના દિગ્ગજ અભિનેતા શશિ કપૂર હૉસ્પિટલમાં દાખલ કરાયા છે, તો બીજા દુઃખદ સમાચાર એ છે કે એક મૉડેલે આત્મહત્યા કરી લીધી છે.

મળતી માહિતી મુજબ શશિ કપૂરને છાતીમાં દુઃખાવાની ફરિયાદ બાદ મુંબઈની કોકિલાબેન ધીરૂભાઈ અંબાણી હૉસ્પિટલમાં દાખલ કરવામાં આવ્યા છે. તેઓ શ્વાસ લેવામાં મુશ્કેલી અનુભવી રહ્યા હતાં. શશિ કપૂરની સારવાર કરતા ડૉ. રામ નારાયણે જણાવ્યું કે હા, શસિ કપૂરને આઈસીયૂમાં રાખવામાં આવ્યા છે, પણ તેમની હાલત સ્થિર છે. ચિંતા કરવાની કોઈ વાત નથી. તેઓ લાંબા સમયથી અસ્વસ્થ છે, તેથી તેમને તકેદારી તરીકે આઈસીયૂમાં રાખવામાં આવ્યાં છે.

બીજી બાજુ સોમવારે સવારે મુંબઈના ઓશિવરા વિસ્તારમાં મૉડેલ એકતા બબ્બરે ધાબા પરથી છલાંગ લગાવી આત્મહત્યા કરી લીધી. માહિતી મળતા જ પોલીસ પહોંચી ગઈ, પરંતુ એકતાનુ ઘટનાસ્થળે જ મોત થઈ ચુક્યુ હતું. પોલીસે એકતાના શબને પોસ્ટમાર્ટમ માટે મોકલી આપ્યુ છે. પોલીસના જણાવ્યા મુજબ પહેલી નજરે આ બનાવ આત્મહત્યાનો લાગે છે, કારણ કે પાડોશીઓના કહ્યા મુજબ એકતા છેલ્લા કેટલાક સમયથી તાણમાં જીવતા હતાં. 6 માસ પહેલા જ તેમના પિતાનું મોત થઈ ગયુ હતું. ઉપરાંત ઘણા વખતથી તેમની પાસે કામ પણ નહોતું. એકતા બબ્બરની ઉંમર 32 વર્ષ હતી.

ચાલો તસવીરોમાં જોઇએ બૉલીવુડના સમાચારો સંક્ષેપમાં :

શશિ કપૂર હૉસ્પિટલમાં

વેટરન એક્ટર શશિ કપૂરને મુંબઈની હૉસ્પિટલમાં દાખલ કરવામાં આવ્યા છે. છાતીમાં દુઃખાવાની ફરિયાદ બાદ તેમને આઈસીયૂમાં રાખવામાં આવ્યાં છે.

મૉડેલનો આપઘાત

મૉડેલ એકતા બબ્બરે મુંબઈમાં આપઘાત કરી લીધો છે. કહે છે કે તેઓ તાણમાં હતાં. તેમની પાસે ઘણા વખતથી કોઈ કામ નહોતું. તેમના પિતાનું છ માસ અગાઉ જ મોત થયુ હતું.

આશિષ બન્યો વિજેતા

રંગરસિયા ફૅમ આશિષ શર્મા ઝલક દિખલા જા 7નો વિજેતા બન્યો છે. ફાઇનલ રાઉંડમાં તેમણે શક્તિ મોહનને માત આપી ખિતાબ જીતી લીધો.

અંડરવિયર બતાવો...

દીપિકા પાદુકોણેના ક્લીવેજ શો વિવાદ બાદ પ્રિયંકા ચોપરાએ ટ્વિટર ચર્ચામાં ખુલાસો કર્યો છે કે ઘણા વર્ષ પહેલા એક દિગ્દર્શકે તેમને અંડરવિયર બતાવવા કહ્યુ હતું કે જેથી તેની ફિલ્મ હિટ થઈ શકે. પ્રિયંકાએ આ ફિલ્મ ઠુકરાવી દીધી હતી.