ઓસાકા પહોંચી એક થા ટાઇગર ફિલ્મની ટીમ
મુંબઈ, 4 માર્ચ : સલમાન ખાનના ચાહનારાઓ દુનિયા ભરમાં મોજૂદ છે. ગત વર્ષે રિલીઝ થયેલ એક થા ટાઇગર ફિલ્મે ભારતથી માંડી વિદેશો સુધી બમ્પર કમાણી કરી હતી. હવે આ ફિલ્મ જાપાનમાં અને જાપાની ભાષામાં રિલીઝ થવા જઈ રહી છે. જાપાનમાં એક થા ટાઇગર એટલે કે ઈટીટી રિલીઝ કરવા માટે તેને જાપાનીઝમાં ડબ કરાઈ છે. ભારતમાં ગત 15મી ઑગસ્ટે રિલીઝ થયેલી એક થા ટાઇગરે પ્રથમ જ દિવસે 33 કરોડની કમાણી કરી હતી.
ઈટીટી જાપાનમાં રિલીઝ થવાથી ખુશખુશાલ દિગ્દર્શક કબીર ખાને ટ્વિટ કરી આ માહિતી લોકોને આપી. હાલ એક થા ટાઇગરના પ્રમોશન માટે કબીર ખાન જાપાનના ઓસાકા શહેર પહોંચી ચુક્યાં છે. કબીર ખાને ગઈકાલે ટ્વિટ કર્યુ હતું - એક થા ટાઇગર જાપાનમાં રિલીઝ થઈ રહી છે. હું ઓસાકા, ક્યોટો અને ટોકિયો જઈ રહ્યો છું ઇંટરવ્યૂ તેમજ પબ્લિસિટી માટે.
દરમિયાન કબીર ખાને આજે સવારે ટ્વિટ કર્યું - એક થા ટાઇગરના પ્રમોશન માટે જાપાનમાં પ્રથમ સ્ટૉપ છે ઓસાકા. બસ અત્યારે અમી અહીં પહોંચ્યાં છે. કબીર ખાને વધુ એક ટ્વિટ કર્યું - સલમાનને સ્ક્રીન ઉપર જાપાની ભાષા બોલતા જોવા હું આતુર છું. કબીર ખાન સાથે એક ટાઇગરના પ્રમોશન માટે યશ બૅનરની આખી ટીમ છે. કબીર ખાન દિગ્દર્શિત ફિલ્મ ઈટીટી ભારતના એક ગુપ્તચર એજંટ અને આઈએસઆઈ એજંટ વચ્ચેની પ્રણય કથા છે.