કોચાદઇયાં બદલ હું સૌંદર્યાની આભારી છું : દીપિકા પાદુકોણે

Published: Monday, March 10, 2014, 13:01 [IST]

મુંબઈ, 10 માર્ચ : તામિળ ફિલ્મ કોચાદઇયાં દ્વારા દક્ષિણ ભારતીય ફિલ્મોદ્યોગમાં સુપર સ્ટાર રજનીકાંત સાથે એન્ટ્રી કરી રહેલાં બૉલીવુડ અભિનેત્રી દીપિકા પાદુકોણેએ જણાવ્યું કે કોચાદઇયાંમાં કામ કરવો એક અનુભવ હતો અને તેમણે આ પડકાર માટે સૌંદર્યા રજનીકાંત અશ્વિન પ્રત્યે આભાર વ્યક્ત કર્યો.

કોચાદઇયાં રજનીકાંતના પુત્રી સૌંદર્યા દ્વારા દિગ્દર્શિત પ્રથમ ફિલ્મ છે. કોચાદઇયાં ભારતની પ્રથમ મૉશન કૅપ્ચર ફોટો-રિયલિસ્ટિક 3ડી એનિમેટેડ ફિલ્મ તરીકે પણ કહેવાઈ રહી છે. કોચાદઇયાં ફિલ્મનો ઑડિયો ગઈકાલે લૉન્ચ કરવામાં આવ્યો. આ પ્રસંગે ફિલ્મના હીરો રજનીકાંત, હીરોઇન દીપિકા પાદુકોણે ઉપરાંત બૉલીવુડના સુપરસ્ટાર શાહરુખ ખાન પણ હાજર રહ્યા હતાં.

ઑડિયો લૉન્ચિંગ પ્રસંગે દીપિકા પાદુકોણે મીડિયા સાથેની વાતચીતમાં જણાવ્યું - સૌપ્રથમ હું આ અનુભવ કરાવવા બદલ સૌંદર્યાનો આભાર વ્યક્ત કરવા માંગીશ. હું કોચાદઇયાંને માત્ર એક ફિલ્મ નહીં કહું, પણ તે એક અનુભવ છે. મને આ ફિલ્મમાં લેવા બદલ સૌંદર્યાનો આભાર. હું તેમને અભિનંદન આપુ છું.

દીપિકા પાદુકોણેએ એ આર રહમાનના સંગીતથી સજેલી કોચાદઇયાં ફિલ્મના ઑડિયો લૉન્ચિંગ ઇવેંટમાં જણાવ્યું - થૅંક યૂ રજની સર એન્ડ આંટી (રજનીકાંતના પત્ની લતા રજનીકાંત) કે જેમણે શૂટિંગ દરમિયાન મારા ઘરથી દૂર હોવા છતાં મને ઘર જેવું અને દીકરી જેવું વાતાવરણ આપ્યું. તામિળ ઇંડસ્ટ્રીમાં મારો આ પ્રવેશ છે અને મને આશા છે કે સૌને મારૂં કામ ગમશે.

નોંધનીય છે કે કોચાદઇયાં ફિલ્મમાં દીપિકા પાદુકોણે રાણી વધના તરીકેનો રોલ કરી રહ્યાં છે. ફિલ્મમાં રજનીકાંત અને દીપિકા પાદુકોણે ઉપરાંત જૅકી શ્રૉફ, આર શરથ કુમાર, નાસેર, આદિ પિનિસેટ્ટી, શોભના તથા રુક્મિણી પણ છે. ઇરોઝ ઇંટરનેશનલ તથા મીડિયા વન ગ્લોબલ એંટરટેનમેંટ દ્વારા સંયુક્ત રીતે નિર્મિત કોચાદઇયાં ફિલ્મ 11મી એપ્રિલે રિલીઝ થવાની છે.

ચાલો જોઇએ કોચાદઇયાં ઑડિયો લૉન્ચિંગ પ્રસંગની તસવીરી ઝલક :