Pushpa 2ના એક્ટર અલ્લૂ અર્જુનના ઘર પર પથ્થરમારો, 6 આરોપીઓની કરાઈ ધરપકડ

હૈદરાબાદના જ્યુબિલી હિલ્સમાં અભિનેતા અલ્લુ અર્જુનના ઘર પર પથ્થરમારો કરવાનો મામલો સામે આવ્યો છે. આ આરોપ ઓસ્માનિયા યુનિવર્સિટીના વિદ્યાર્થીઓના જૂથ પર છે. અભિનેતાના ઘરની બહાર તૂટેલા પોટ સહિતની કેટલીક તસવીરો સામે આવી છે, જે દર્શાવે છે કે ત્યાં પથ્થરમારો થયો હતો. પોલીસે આ મામલે કડક કાર્યવાહી હાથ ધરી છે. ઓસ્માનિયા યુનિવર્સિટીની જોઈન્ટ એક્શન કમિટી (JAC)ના 6 સભ્યો વિરુદ્ધ કેસ નોંધવામાં આવ્યો છે.

અભિનેતા અલ્લુ અર્જુનના ઘર પર પથ્થરમારો એવા સમયે થયો છે જ્યારે પુષ્પા 2 ના શો દરમિયાન સિનેમા હોલમાં નાસભાગ દરમિયાન એક મહિલાનું મોત થયું હતું અને એક બાળક ઘાયલ થયું હતું. રવિવારે, ઓસ્માનિયા યુનિવર્સિટીના વિદ્યાર્થી નેતાઓના જૂથે અભિનેતાના ઘરની બહાર વિરોધ પ્રદર્શન કર્યું, મૃતક મહિલાના પરિવારના સભ્યોને વળતરની માંગણી કરી.

અલ્લુ અર્જુનના ઘર પર પથ્થરમારો કરવાનો વીડિયો પણ વાયરલ થઈ રહ્યો છે. જેમાં જોઈ શકાય છે કે લોકોનું એક જૂથ હૈદરાબાદના જ્યુબિલી હિલ્સમાં અર્જુનના ઘર પર હુમલો કરતા જોવા મળે છે. ભીડ અલ્લુ અર્જુનના ઘર પર નારા લગાવી રહી છે અને પથ્થરમારો કરી રહી છે.

1 કરોડના વળતરની માંગણી

સૂત્રોચ્ચાર ઉપરાંત પ્રદર્શનકારીઓએ અલ્લુ અર્જુનની સંપત્તિને નુકસાન પહોંચાડ્યું હતું. તેમના વિરોધ દરમિયાન, વિરોધીઓએ અભિનેતાના નિવાસસ્થાનની બહાર રાખવામાં આવેલા ફૂલના કુંજાનો પણ નાશ કર્યો હતો અને પુષ્પા 2 નાસભાગના પીડિતાના પરિવાર માટે 1 કરોડ રૂપિયાના વળતરની માંગ કરી હતી.

પથ્થરમારાના કારણે ઘરમાં નુકસાન

DCP પશ્ચિમ ઝોન, હૈદરાબાદએ એક નિવેદનમાં જણાવ્યું હતું કે, "આજે લગભગ 4.45 વાગ્યે, કેટલાક લોકો હાથમાં પ્લેકાર્ડ લઈને અચાનક અભિનેતા અલ્લુ અર્જુનના જ્યુબિલી હિલ્સ નિવાસસ્થાને પહોંચ્યા અને સૂત્રોચ્ચાર કરવા લાગ્યા અને તેમાંથી એક પરિસર પર ચઢી ગયો અને ટામેટાં ફેંકવાનું શરૂ કર્યું. સુરક્ષા કર્મચારીઓએ વિરોધ કર્યો અને તેમને દિવાલ પરથી નીચે આવવા સમજાવવાનો પ્રયાસ કર્યો, તેઓ બોલાચાલીમાં પ્રવેશ્યા, સુરક્ષા કર્મચારીઓ સાથે ઝપાઝપી કરી અને રેમ્પ પર મૂકવામાં આવેલા કેટલાક ફૂલના કુંજાનો નાશ કર્યો.

6 વ્યક્તિની કરવામાંં આવી ધરપકડ

DCPએ જણાવ્યું હતું કે, "માહિતી મળતાં જ, જ્યુબિલી હિલ્સ પોલીસ પહોંચી અને 6 વ્યક્તિઓની અટકાયત કરી, જે તમામ ઓસ્માનિયા યુનિવર્સિટી જોઈન્ટ એક્શન કમિટી (OU-JAC) નો ભાગ હોવાનો દાવો કરે છે. ઉપરોક્ત ગુનામાં સામેલ 6 વ્યક્તિઓ અને અન્ય લોકોની ધરપકડ કરવામાં આવી છે. આ તમામ સામે કેસ નોંધવામાં આવ્યો છે અને તમામ સામે કાયદા મુજબ કડક કાર્યવાહી કરવામાં આવી રહી છે.